UQShU-nyń rıtorıkasy qatal, áıtse de belgili bir deńgeıde qısyndy bolýǵa tıis – Toqaev

<p>Qasym-Jomart Toqaev UQShU Ujymdyq qaýipsizdik keńesiniń shaǵyn quramda ótken sessııasyndasóılegen sózinde osyndaı pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform </a>Aqordanyń <a href="https://www.akorda.kz/kz/memleket-basshysy-ukshu-uzhymdyk-kauipsizdik-kenesinin-shagyn-kuramda-otken-sessiyasyna-katysty-23101744" target="_blank" rel="noopener">baspasóz</a> qyzmetine silteme jasap.</p>

Jıynda Qasym-Jomart Toqaev UQShU aıasyndaǵy seriktesterdiń ádettegi qaýip-qater deńgeıiniń ulǵaıýyna, sonyń ishinde esirtki, qarý-jaraq aınalymynyń, transshekaralyq qylmys pen zańsyz mıgratsııanyń ósýine qatysty alańdaýshylyǵyna túsinistikpen qaraıtynyn málimdedi.

Qazaqstan Uıymǵa múshe memlekettermen birge osy syn-qaterlerge aldaǵy ýaqytta da tótep berýge ázir.

– Biz UQShU qyzmetiniń ádis-tásili men strategııasyn jolǵa qoıa otyryp, zamanaýı qaýip-qater men syn-tegeýrinderdi mindetti túrde eskerýge tıispiz. Sonymen qatar UQShU-ǵa múshe memleketterdiń qaýipsizdigine qater tónip kele jatqanyn, eger ondaı qaýip bolsa da, ony únemi aıta berýdiń qajeti joq dep oılaımyn. Túptep kelgende, qaýip-qater árdaıym bolǵan. Halyqaralyq qoǵamdastyqtyń bolmysy osyndaı. Bul taqyrypty qaıta-qaıta kóterý, bizdi áldekimnen qorqatyndaı kórinis qalyptastyrady. Mundaı málimdemeler múlde qate túsinikke alyp kelýi múmkin, tipti qazirdiń ózinde solaı bolyp kórinedi. Qatysýshy memleketterdiń abyroı-bedelin jáne olardyń áskerı-saıası áleýeti men qýatyn eskere otyryp, Uıymnyń rıtorıkasy qatal, áıtse de belgili bir deńgeıde qısyndy bolýǵa tıis. UQShU bedeldi áskerı-saıası uıym retinde óziniń jetistikterin pash etti. Biraq aldymyzda uıymǵa múshe memleketterdiń konstrýktıvti múddesine saı kelýge tıis jańa mindetter tur, – dedi Qazaqstan Prezıdenti.

Sonymen qatar Qasym-Jomart Toqaev Uıymnyń áleýetin damytý jáne syn-qater men qaýipke qarsy is-qımyl tetikteriniń tıimdiligin arttyrý úshin bir jyl ishinde aýqymdy jumys atqarylǵanyn atap ótti. Prezıdent 2024 jyldyń 1 qańtarynan bastap Qazaqstan Uıymǵa tóraǵalyq etetinin jáne osy kezeńde basymdyq beriletin baǵyttardy keńeıtilgen quramdaǵy jıyn barysynda jetkizetinin aıtty.

Qasym-Jomart Toqaev elimizdiń Uıymdy qarqyndy ári teńgerimdi damytýǵa, barlyq múshe memlekettiń ulttyq múddelerin eskere otyryp, ujymdyq qaýipsizdikti nyǵaıtýǵa nıetti ekenin málimdedi.