UQShU-na múshe elderdiń qorǵanys mınıstrleri onlaın formatta keńes ótkizdi

NUR-SULTAN. QazAqparat - 2020 jyldyń 1 jeltoqsanynda Ujymdyq qaýipsizdik sharty uıymyna qatysýshy memleketterdiń qorǵanys vedomstvalary basshylarynyń kezekti otyrysy beıne konferentsııa baılanysy rejıminde ótti.

Qorǵanys mınıstrleriniń keńesi áskerı saıasat, áskerı qurylys jáne áskerı-tehnıkalyq yntymaqtastyq salasyndaǵy Ózara is-qımyldy úılestirý máseleleri jónindegi uıymnyń resmı jarǵylyq konsýltatıvtik jáne atqarýshy organy bolyp tabylady, dep habarlaıd QazAqparat QR Qorǵanys mınıstrliginiń resmı saıtyna silteme jasap.

Atalǵan keńeske Qazaqstan Respýblıkasynyń atynan Qorǵanys mınıstri general-leıtenant Nurlan Ermekbaev qatysty.

Qorǵanys vedomstvolarynyń basshylary áskerı qaýipsizdikke tónetin qaýip-qaterlerge qatysty pikir almasty, áskerı sheńberdegi UQShU qyzmetiniń basym baǵyttaryn kelisti.

Otyrys barysynda materıaldyq-tehnıkalyq, medıtsınalyq qamtamasyz etý, bitimgershilik qyzmet, kadrlar daıarlyǵyn, ǵylymı-zertteý jumystaryn jetildirý, sondaı-aq UQShU ujymdyq kúshteriniń birlesken jaýyngerlik daıarlyq is-sharalary qatysty birqatar máseleler qaraldy.

«Oqý-jattyǵý stsenarııine qazirgi qarýly qaqtyǵystardan alynǵan sabaqtardy qosý qajet dep sanaımyz. Biz qaýip-qaterlerge ujymdyq toıtarys berýge daıyn ekenimizdi kórsetip, jaýyngerlik is - qımyldardy júrgizýdiń jańa ádisteri men tásilderin pysyqtaýǵa tıispiz»,- dep general-leıtenant Nurlan Ermekbaev atap ótti.

Sonymen qatar, taraptar 2021-2025 jyldarǵa arnalǵan Uıymǵa múshe memleketterdiń áskerı yntymaqtastyqty damytý josparyn talqylady.