UQShU-na múshe elder Reseıdiń Qıyr Shyǵysyndaǵy sý tasqyny saldaryn joıýǵa járdemdesýge ázir

MÁSKEÝ. 16 tamyz. QazAqparat - Reseıdiń Qıyr Shyǵysy men Amýr aımaǵyndaǵy sý tasqyny qazirgi ýaqytta mıllıon sharshy shaqyrym jerge jaıyldy. Odan basqa, Habarovsk ólkesi, Evreı avtonomdy oblysy, Chelıabınsk oblysy, Bashqurtstan jeri sý astynda qalyp jatyr.

Reseı TJM-niń málimetinshe, bárinen buryn Qıyr Shyǵystaǵy jaǵdaı aýyr bolyp tur. Ásirese, Amýr oblysynda sý tasqyny áli óz shyńyna jetken joq, al ol jaqtaǵy jaǵdaı qazirdiń ózinde asa kúrdeli dep baǵalanýda. Aımaqta 30 myń adam men 5,2 myń tehnıkadan quralǵan qutqarýshy toptar quryldy. Sondaı-aq temir jol áskerleri men kúsh qurylymdary áskerı daıyndyq rejimine turǵyzyldy.

Osyǵan oraı Reseı úkimeti federatsııanyń jeti sýbektisindegi tasqyn saldaryn joıýǵa 3,2 mlrd. rýbl kóleminde qarjy bóldi. TJ aýmaǵynda bolǵan adamdardyń árqaısysyna bir jolǵy tólem retinde 10 myń rýblden beriledi. Múlkiniń belgili bir bóliginen aıyrylǵandarǵa 50 myń rýblden, al bar múlkinen aıyrylǵandarǵa 100 myń rýblden járdemaqy tólenedi.

Qıyr Shyǵystaǵy tabıǵattyń dúleı kúshimen kúresýge jáne onyń saldaryn joıýǵa Ujymdyq qaýipsizdik sharty uıymyna múshe elderdiń Tótenshe jaǵdaı mınıstrlikteri óz kómekterin usyndy. Qazirgi ýaqytta olar praktıkalyq kómek máselelerin qarastyryp, naqty qajetti kúsh-quraldardy anyqtaýda.