UQShU múshe memleketteri Semeı polıgony jabylýynyń 30 jyldyǵyna oraı málimdeme jasady

NUR-SULTAN. QazAqparat - Ujymdyq qaýipsizdik týraly shart uıymyna múshe memleketterdiń syrtqy ister mınıstrleri «Semeı ıadrolyq synaq polıgony jabylýynyń 30-jyldyǵyna oraı» birlesken málimdeme qabyldady. Bul týraly QazAqparat QR SІM resmı saıtyna silteme jasap habaarlaıdy.

UQShU quramyndaǵy alty eldiń birlesken málimdemesinde Semeı ıadrolyq polıgonyn óz Jarlyǵymen 30 jyl buryn japqan Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń róli erekshe atap ótildi.

Mınıstrler atap ótkendeı, bundaı tarıhı qadam ıadrolyq synaqtardy ótkizýge jan-jaqty tyıym salý ıdeıasyn ilgeriletý jolyndaǵy mańyzdy kezeń boldy. Qujatta Semeı ıadrolyq polıgonynyń jabylýy búkil álemdegi ıadrolyq synaqtarǵa moratorıı qoıý jónindegi halyqaralyq is-qımylǵa jáne 2006 jyly Ortalyq Azııadaǵy ıadrolyq qarýdan azat aımaqty qurýǵa aldyn ala sharty bolǵany basa aıtyldy.

Semeı polıgonynyń jabylýy ýaqytynan bastap onyń aýmaǵy men irgeles aýmaqtaryn qalpyna keltirý, sondaı-aq radıatsııalyq qaýipsizdikti qamtamasyz etý jáne qorshaǵan ortany qalpyna keltirýge baǵyttalǵan Qazaqstannyń aýqymdy jumysy atap ótildi. ıAdrolyq taratýdyń qaýipin joıý maqsatynda Qazaqstan Respýblıkasynyń Reseı Federatsııasymen jáne Amerıka Qurama Shtattarymen burynǵy polıgon aýmaǵynda júzege asyrǵan birlesken jobalarynyń mańyzdylyǵy basa aıtyldy.

Qujatta 2020 jylǵy jeltoqsanda qabyldanǵan BUU Bas Assambleıasynyń «Qazaqstandaǵy Semeı aýmaǵynyń turǵyndaryn ońaltý, qorshaǵan ortany qalpyna keltirý jáne ekonomıkalyq damytý maqsatyndaǵy halyqaralyq yntymaqtastyq» atta qararyna qoldaý bildirildi. Sondaı-aq ıAdrolyq synaqtarǵa jalpyǵa birdeı tyıym salý týraly sharttyń tezirek kúshine engizý maqsatyna Uıym elderiniń beriktigi atap ótildi.

Jalpy, UQShU elderi ıadrolyq qarýdan óz erkimen bas tartqan Qazaqstannyń ıadrolyq qarýdy taratpaý rejımin nyǵaıtýǵa, halyqaralyq qaýipsizdik pen turaqtylyqty saqtaýǵa qosqan úlesin basa aıtty.