UQShU mıssııasy: Qazaqstannyń saılaý ótkizý tájirıbesin ózge elder de qoldana alady

NUR-SULTAN. QazAqparat – Qazaqstandaǵy Májilis pen máslıhattar depýtattaryn saılaý joǵary deńgeıde uıymdastyrylǵan. Mundaı pikirdi RF Memlekettik dýmasy TMD isteri, Eýrazııalyq ıntegratsııa jáne otandastarmen baılanys komıteti tóraǵasynyń orynbasary, UQShU Parlamenttik assambleıasynan baıqaýshylar mıssııasynyń múshesi Ýmahan Ýmahanov bildirdi, dep habarlaıdy QazAqparat tilshisi.

«Keshe 49 saılaý ýchaskesinde boldyq. Birde-bir zań buzýshylyq tirkelgen joq. Saılaý joǵary deńgeıde uıymdastyryldy. Pandemııaǵa baılanysty qazaqstandyq tarap qorǵanys zattaryn uıymdastyryp, qolǵap, maska taratty. Antıseptıkalyq zattarmen zararsyzdandyryp otyrdy. Osynaý kúrdeli ýaqytta Qazaqstan saılaýdy qalaı uıymdastyrǵanyn kórdik jáne ózge elder de qazaqstandyq tájirıbeni qoldanady dep oılaımyn», - dedi ol.

RF Federaldy jınalysy Federaldy keńesiniń Halqaralyq ister jónindegi komıteti tóraǵasynyń orynbasary, joǵaryda atalǵan mıssııa múshesi Baır Jamsýev te Qazaqstandaǵy saılaýdyń joǵary deńgeıde ótkendigin aıtady.

«Keshe biz barlyq saıası partııanyń shtabtarynyń ókilderimen kezdestik. Saılaý komıssııalarynyń jumysyna, memlekettik bılik organdary tarapynan saılaýaldy naýqan jumysyna aralasýǵa qatysty birde-bir shaǵym estimedik. Sondyqtan da biz jumysymyzdyń qorytyndysy boıynsha sońǵy málimdememizde birde-bir zań buzýshylyqty nemese shaǵymdy atap óte almadyq. Mıssııamyz saılaýdyń saılaý týraly Qazaqstannyń ulttyq zańnamasy men halyqaralyq normalardy qatań saqtaı otyryp, joǵary uıymdastyrýshylyq deńgeıde ótti dep baǵalaıdy»,- dedi Baır Jamsýev.