UQShU-ǵa múshe elder áskerı qaýipsizdik máselesin talqylady

NUR-SULTAN. QazAqparat – Ujymdyq qaýipsizdik týraly shart uıymyna (UQShU) múshe memleketter ókilderi uıym aýmaǵyndaǵy áskerı qaýipsizdik máselelerin talqylady. QazAqparat bul týraly QR Qorǵanys mınıstrliginiń baspasóz qyzmetine silteme jasap habarlaıdy.

Málim etilgendeı, beınekonferentsııa rejıminde ótken keńes barysynda uıymnyń jaýapkershilik aımaǵyndaǵy áskerı qaýipsizdik máseleleri, sondaı-aq daǵdarysqa den qoıý tetikterin jetildirý jáne UQShU-ǵa múshe memleketter qarýly kúshteri avıatsııasynyń halyqaralyq ushýlaryn uıymdastyrý máseleleri talqylandy.

Otyrysqa Qazaqstan, Armenııa, Belarýs, Qyrǵyzstan, Reseı, Tájikstan Qarýly kúshteri bas shtabtarynyń bastyqtary, UQShU Birikken shtabynyń bastyǵy, sondaı-aq uıymǵa múshe memleketter qorǵanys vedomstvolarynyń ókilderi qatysty. Qazaqstan Respýblıkasynyń Qarýly kúshterinen Qorǵanys mınıstriniń birinshi orynbasary – Bas shtab bastyǵy general-leıtenant Marat Qusaıynov qatysty.

Sondaı-aq taraptar 2022 jyly UQShU Ujymdyq qaýipsizdik júıesiniń basqarý organdaryn, kúshteri men quraldaryn birlesip daıarlaý is-sharalaryn ótkizý josparyn maquldady.

Eske salaıyq, aldaǵy kúz aılarynda Qazaqstan Respýblıkasynyń «Mátibulaq» polıgonynda UQShU áskerleri (ujymdyq kúshteri) materıaldyq-tehnıkalyq qamtamasyz etý bólimsheleriniń «Eshelon – 2022», barlaý kúshteri men quraldarynyń «Іzdestirý – 2022» arnaıy oqý-jattyǵýlary men UQShU jedel den qoıý ujymdyq kúshteriniń «Ózara is-qımyl – 2022» komandalyq-shtabtyq oqý-jattyǵýlaryn ótkizý josparlanǵan.