UQShU elderiniń prezıdentteri Qazaqstan atqarǵan jumystardy joǵary baǵalady

ASTANA. QazAqparat - Ujymdyq qaýipsizdik shart uıymyna múshe elderdiń memleket jáne úkimet basshylary Qazaqstannyń uıymǵa tóraǵalyq kezinde atqarǵan jumystaryna joǵary baǵa berdi. Bul týraly búgin UQShU Ujymdyq qaýipsizdik keńesiniń sessııasynan keıin BAQ ókilderine málimdeme jasaǵan uıym bas hatshysynyń orynbasary Valerıı Semernıkov aıtty,  dep habarlaıdy QazAqparat tilshisi.

«Qazaqstan tarapy uıymǵa tóraǵalyǵy kezeńinde qolǵa alǵan órshil basymdyqtarǵa aıryqsha nazar aýdarylǵandyǵyn aıtýǵa tıispin. Búgin memleket basshylaryna jáne barlyq qatysýshylarǵa bul bastamalardyń tabysty oryndalǵany pash etildi. Shyndyǵynda da biz Qazaqstan aýmaǵynda óte kóp tájirıbelik sharalar ótkizdik. Ótken barlyq sharalar, oqý jattyǵýlary, arnaıy operatsııalar, jıyndar, komandalyq-shtabtyq jattyǵýlar óte joǵary deńgeıde uıymdastyryldy. Áleýetti nyǵaıtýda ózindik nátıje men tıimdilikke ıe boldy»,-  dedi ol. 

Sonymen qatar Valerıı Semernıkov sessııa barysynda memleket basshylary ózara pikir almasyp, álemdik jáne óńirlik qaýipsizdiktiń keń aýqymdy problemalary talqylaǵandyǵyn atap ótti.

«Bul shaǵyn quramda talqylaýǵa engizilgen negizgi máselelerdiń biri boldy. Memleket basshylary atalǵan máselelerdi tyńǵylyqty talqylaýǵa óte kóp ýaqyt bóldi. Sáıkesinshe ýaǵdalastyqqa qol jetkizildi jáne UQShU formatyn syn-tegeýirinderdiń barlyq spektrlerine qarsy is-qımylǵa baǵyttaý boıynsha jumystardy jandandyrýǵa tapsyrma berildi»,-  dedi ol.