UQShU elderi Qazaqstanǵa der kezinde qoldaý kórsetti – Qorǵanys mınıstrligi

NUR-SULTAN. QazAqparat – UQShU-ǵa múshe elder terrorıstik shabýyl kezinde Qazaqstanǵa der kezinde qoldaý men kómek kórsetti. QR Qorǵanys mınıstrligi Halyqaralyq yntymaqtastyq departamentiniń bastyǵy Oljas Qusaıynov ortalyq kommýnıkatsııalar qyzmetinde ótken brıfıngide osyndaı pikir bildirdi, dep habarlaıdy QazAqparat tilshisi.

«Qazaqstanda UQShU-nyń bitimgershilik áleýetin óristetý der kezinde jáne tıimdi boldy. Іs júzinde vedomstvoaralyq jáne memleketaralyq ózara is-qımyl jáne uıym ishindegi úılestirý tetikteri pysyqtaldy.

Memleket basshysy uıymnyń jaqsy tájirıbe jınaqtap, bedeldi áskerı-saıası uıym retinde óziniń tıimdiligin kórsetkenin atap ótti. Іs júzinde bolǵan oqıǵalar UQShU-nyń damýyndaǵy sheshýshi kezeń bolyp, qýatty halyqaralyq ınstıtýt retinde jańa sıpat aldy.

Uıymǵa múshe elder terrorıstik shabýyl kezinde Qazaqstanǵa der kezinde qoldaý men kómek kórsetti», -dedi mınıstrlik mamany.

Sondaı-aq, ol Qazaqstan Qorǵanys mınıstrliginiń atynan Armenııa, Belarýs, Qyrǵyzstan, Reseı jáne Tájikstan syndy uıymǵa múshe memleketterdiń qorǵanys vedomstvolaryna moraldyq turǵyda qoldaǵany, tikeleı jáne jedel áskerı kómek kórsetkeni úshin alǵys bildirdi.

«Bul operatsııa kópjyldyq yntymaqtastyq barysynda jasalǵan tetikterdi is júzinde qoldanýdyń mysaly ǵana emes, sonymen birge odaqtas memleketterdiń jaýyngerlik baýyrlastyǵy men rýhynyń naqty dáleli retinde uıymnyń tarıhyna enetini sózsiz», - dedi Oljas Qusaıynov.