UQShU bitimgershilik kúshteri Qazaqstanǵa ýaqytsha keldi – Shahrat Nuryshev

NUR-SULTAN. QazAqparat – UQShU-nyń ujymdyq bitimgershilik kúshteri Qazaqstanǵa ýaqytsha keldi. Bul týraly Qazaqstan Respýblıkasy Syrtqy ister mınıstriniń birinshi orynbasary Shahrat Nuryshev málim etti, dep habarlaıdy QazAqparat tilshisi.

«Qaýipsizdik keńesiniń otyrysynda Memleket basshysy qabyldaǵan sheshimge sáıkes, Ujymdyq qaýipsizdik sharty uıymyna múshe memleketterdiń bitimgershilik kúshteriniń Qazaqstanǵa kelgeni belgili. Bul kúshter Qazaqstanǵa ýaqytsha kelip otyr. Biz, Qazaqstan, osy Ujymdyq qaýipsizdik sharty uıymynyń múshesi bolǵandyqtan UQShU-nyń 4-babyna sáıkes memlekettiń aýmaqtyq tutastyǵyna, egemendigine qaýip tóngen kezde basqa múshe memleketterden kómek suraýǵa quqyǵymyz bar. Qaýipsizdik keńesiniń otyrysynda «Qazaqstannyń tutastyǵyna qaýip tónip tur jáne terrorlyq kúshterdiń shabýyly boldy» delingen quzyrly organdardyń aqparaty negizinde sheshim qabyldandy. Sondyqtan Prezıdent UQShU-ǵa múshe memleketterdiń basshylaryna úndeý jasady. Qysqa merzimniń ishinde múshe memleketterdiń basshylary bul úndeýge oń jaýap berip, óz kúshterin jiberdi. Qazirgi ýaqytta bul kúshter Qazaqstanǵa kelip, qaýipsizdikti qamtamasyz etýge úlshes qosyp jatyr», - dedi QR Syrtqy ister mınıstrliginde uıymdastyrylǵan brıfıng barysynda Shahrat Nuryshev.