UQShU bitimgerlik kúshiniń oqý-jattyǵýy Qazaqstanda ótedi

ASTANA. QazAqparat - QR Qorǵanys mınıstrligi Qazaqstanda aldaǵy «Myzǵymas baýyrlastyq - 2017» oqý-jattyǵýy boıynsha resmı habarlama taratty, dep habarlaıdy «QazAqparat» HAA vedomstvonyń baspasóz qyzmetine silteme jasap.

QR Qorǵanys mınıstrligi habarlaǵandaı, 16-20 qazan kúnderi Qazaqstan aýmaǵynda («Іle» polıgony) «Myzǵymas baýyrlastyq - 2017» Ujymdyq qaýipsizdik sharty uıymynyń (UQShU) bitimgerlik kúshterimen birge shıelenisten keıingi jaǵdaıdy retteý boıynsha jattyǵýy ótedi.

Oqý-jattyǵýǵa Armenııa, Belarýs, Qazaqstan, Qyrǵyzstan, Reseı jáne Tájikstannyń bitimgerlik kontıngentteri, Ujymdyq qaýipsizdik sharty uıymy Ujymdyq bitimgerlik kúshteriniń (UBK) quramyna kiretin polıtsııa bólimsheleri qatysady.

Qazirgi ýaqytta QR aýmaǵynda Armenııa, Belarýs, Reseı, Tájikstannan kelgen bitimgerlik kontıngentteri bar. Qyrǵyzstan kontıngenti búgin keledi, saǵat 13.00-de áskerı qyzmetshiler alty áskerı tehnıkamen Qyrǵyzstan-Qazaqstan shekarasyn kesip ótti jáne oqý-jattyǵý ornyna kele jatyr.