UQShU birikken shtaby 20 jyldyq mereıtoıyn atap ótti

ASTANA. QazAqparat – Máskeýdegi Halyqaralyq áskerı ortalyqta Ujymdyq qaýipsizdik shart uıymy Birikken shtabynyń 20 jyldyq mereıtoıyna arnalǵan saltanatty is-shara ótti, dep habarlaıdy QazAqparat tilshisi.

Uıymnyń áskerı quramdas bóligine qatysty qyzmettiń negizgi nátıjeleri týraly UQShU Birikken shtabynyń bastyǵy, general-polkovnık Anatolıı Sıdorov baıandama jasady.

Ol Birikken shtabqa áskerlerdi (ujymdyq kúshterdi) qoldanýǵa, UQShU elderiniń jedel jáne jaýyngerlik daıarlyqtyń birlesken is-sharalaryn ótkizýine, áskerı-tehnıkalyq yntymaqtastyqqa, Qarýly Kúshter úshin kadrlardy birlesken daıarlaýdy úılestirýge baılanysty mindetter júkteletinin eske saldy. Budan basqa, UQShU Birikken shtaby daǵdarysqa qarsy áreket etý ortalyǵynyń jumysyn uıymdastyrady.

«UQShU Birikken shtaby qyzmetindegi negizgi kúsh-jiger UQShU-ǵa múshe memleketter basshylarynyń, qorǵanys vedomstvolary basshylarynyń uıymnyń áskerı quramdas bóligin damytý jónindegi sheshimderiniń oryndalýyn uıymdastyrýǵa baǵyttalǵan», - dep atap ótti A. Sıdorov.

«Ujymdyq qaýipsizdikke syn-tegeýrin men qaýip-qaterlerdiń artýynyń qazirgi jaǵdaıynda jáne alys bolashaqta Birikken shtab uıymnyń yqtımal daǵdarysty jaǵdaılarǵa pármendi ári tıimdi áreket etýge daıyndyǵyn qamtamasyz etý úshin barlyq kúsh-jigerin jumsaıdy. Áskerlerdi, ujymdyq kúshterdi damytý jáne uıymǵa múshe memleketterdiń egemendigi men aýmaqtyq tutastyǵyn qamtamasyz etý jónindegi mindetterdi sheshýdi jalǵastyrady», - dedi shtab bastyǵy.

UQShU Bas hatshysy Imanǵalı Tasmaǵambetov Birikken shtab qurylǵan sátten bastap 20 jyl ishinde ujymdyq qaýipsizdik, ujymdyq kúsh áskerleri men uıymnyń birlesken áskerı júıeleri, birlesken daıyndyq, josparlaý jáne qoldaný júıesi qurylǵanyn, áskerlerdi jan-jaqty qamtamasyz etý tártibi belgilengenin atap ótti.

«Búginde UQShU-nyń Birikken shtaby qıyn jaǵdaıda jumys isteıdi. Halyqaralyq qatynastar tereń ózgeristi bastan keshirip otyr. Ondaǵan jyldar boıy qalyptasqan álemdik tártip negizderi ózgerip jatyr. Álemdik saıasattyń negizgi salalarynda jalpyǵa birdeı jáne óńirlik qaýipsizdik ımperatıvterine nuqsan keltire otyryp, óz múddelerin qamtamasyz etýge umtylý baıqalady», - dedi I. Tasmaǵambetov.

Saltanatty kezdesý aıasynda UQShU-ǵa múshe memleketter ókilderi Birikken shtabtyń 20 jyldyǵyna arnalǵan mereıtoılyq medalmen jáne Ulttyq qorǵanys mınıstrlikteriniń vedomstvolyq nagradalarymen marapattaldy.

Eske salsaq, Ujymdyq qaýipsizdik týraly shart uıymynyń Birikken shtabynda 2023 jyly Uıym áskerleriniń (Ujymdyq kúshterdiń) birlesken oqý-jattyǵýlaryn uıymdastyrý jáne atqarý boıynsha alǵashqy kelissózder ótken bolatyn.