UQShU baıqaýshylary Qazaqstandaǵy saılaýdy joǵary baǵalady

NUR-SULTAN. QazAqparat – Ujymdyq qaýipsizdik týraly shart uıymynyń baıqaýshylary Qazaqstanda ótken saılaýdy joǵary baǵalaıdy. Bul týraly RF Memlekettik dýmasyndaǵy TMD, eýrazııalyq ıntegratsııa jáne otandastarmen baılanys komıteti tóraǵasynyń orynbasary, halyqaralyq baıqaýshy Ýmahan Ýmahanov aıtyp berdi, dep habarlaıdy QazAqparat tilshisi.

«Biz, UQShU baıqaýshylar mıssııasy Parlamenttik assambleıa tóraǵasy Vıacheslav Volodınniń ókimimen osyndamyz. Bul mıssııaǵa UQShU elderiniń barlyǵy kiredi. Keshe biz Nur-Sultandaǵy 49 saılaý ýchaskesine bardyq jáne biz barǵan ýchaskelerde quqyqbuzýshylyq bolǵan joq. Saılaý óte joǵary deńgeıde uıymdastyryldy. Pandemııaǵa baılanysty qorǵanys quraldary, bir rettik maskalar men qolǵaptar taratyldy, barlyq kelýshiler zararsyzdandyryldy. Jáshikter móldir shynydan jasaldy. Meniń oıymsha, keshe baıqaýshy bolǵan parlament ókilderi Qazaqstandaǵy saılaýdyń uıymdastyrylý deńgeıin kórdi jáne óz elderinde bul tájirıbeni qoldanady», - dedi Ýmahan Ýmahanov Nur-Sultanda Hilton Garden Inn qonaqúıinde ótken baspasóz máslıhatynda.

Onyń aıtýynsha, UQShU baıqaýshylary Qazaqstannyń barlyq óńirlerin aralap shyqty.

«Biz keshe saılaý ýchaskeleri jabylǵan soń, komıssııa múshelerimen kezdestik jáne qorytyndylaryn túıindedik. Bizdiń ókilder júrgizgen jumysta birde-bir zańbuzýshylyq baıqalmaǵanyn qaıtalaǵym keledi. Men ózim Memlekettik dýmanyń eki shaqyrylymynda depýtat boldym jáne kóptegen saılaýdarda baıqaýshy boldym. Biraq, Qazaqstandaǵy saılaý sekildi joǵary deńgeıdegi uıymdastyrý óte sırek kezdesedi», - dep baǵalady halyqaralyq baıqaýshy.