UQShU áreketi Táýelsizdigimizge eshqandaı da kóleńke túsirmeıdi - Nurlan Orazalın
«Bizde bir ǵana Otan bar, ol – Qazaq eli. Qazaq eliniń basyna talaı aýyrtpalyq túsken edi. Biz - Táýelsizdiktiń qadirin biletin, eldiktiń amanatyn arqalaǵan urpaqpyz. Osy jalǵyz Otanymyzdyń basyna sońǵy úsh-tórt kúnniń ishinde óte aýyr synnan ótip jatyrmyz. Bul synnan aman ótý úshin, Otanymyzdy saqtaý úshin halyq ózi saılaǵan Prezıdentiniń sheshimin qabyldap, qoldaýy kerek jáne durys túsingeni abzal. Óıtkeni, dál osy sheshim bolmaǵan jaǵdaıda, biz qandaı kúnde bolarymyz belgisiz edi. ıAǵnı bir sátte, bir kezde búkil Qazaqstannyń Uly baıtaǵyna, oblystardaǵy strategııalyq ordalarymyz turǵan jerdiń bárine lańkestikpen, basbuzarlyqpen josparly túrde memlekettik tutastyǵymyzǵa jasalǵan shabýyldy qaıtarý úshin Qasym-Jomart Kemeluly taǵdyrsheshti sheshimge barǵanyn durys dep esepteımin», - dedi N. Orazalın.
Sonymen qatar ol UQShU múshe elderge óz kómegin usynatyn uıym ekenin atap ótti.
«Endeshe, osyndaı uıymnyń kelip, qadaǵalap otyrýy jáne ses bolyp syrttaǵy kúshterge óziniń qabiletin tanytýy bizdiń Táýelsizdigimizge eshqandaı da kóleńke túsire qoımaıdy dep oılaımyn. Sondyqtan osyndaı kezeńde úlken álemdik deńgeıge kóterilgen, oılaý júıesi analıtıkalyq paıymdaý mektebinen ótken, qazirgi batystyń ári shyǵystyń jaǵdaıyn jaqsy biletin Prezıdentimizdiń tóńireginde shoǵyrlanýymyz kerek. Ol - úlken saıasatker, qaıratker tulǵa. Bul óz kezeginde ult pen urpaq úshin, sondaı-aq memleketimizdiń tutastyǵyn saqtaý úshin kerek. Dál osy sátte lańkes buzaqylardyń beti qaıtqanymen, onyń arǵy jaǵynda sol jolǵa salǵandardyń beti men jospary qaıta qoıdy dep esepteýge bolmaıdy. Adasqan balalarymyzdyń taǵdyry qıyn jaǵdaıǵa baratynyn bilemiz», - dedi Memlekettik syılyqtyń laýreaty.
N. Orazalın ótken kúnderi Memleket basshysy halyqqa mańyzdy usynystaryn aıtqanyn, sabyrǵa shaqyrǵanyn eske saldy.
«Tyńdaǵan eldiń birazy jastardy sabyrǵa shaqyryp jatty, al tyńdamaǵandary lańkestik syrttan daıyndalyp kelgen kúshterdiń jeteginde ketti. Qan tógildi, eldiń basyna túsken qaraly kúnde bizdiń tutastyǵymyz kerek. Dál osy syn-saǵattarda bizge elimizdi saqtaý úshin qandaı bolmasyn sheshimge barý kerek. Ózimiz saılaǵan bilikti Prezıdenttiń tóńireginde toptasý mańyzdy. Bul qazirgi jaǵdaıdaǵy tyǵyryqtan alyp shyǵar jalǵyz jol dep esepteımin. Biz qalpymyzǵa keletin bolsaq, besikte jatqan balanyń bolashaǵy tynysh bolady. Eldiń bútindigi úshin osyndaı áreketke tutas halyq bolyp aqylmen, parasatpen barýymyz kerek dep esepteımin. Sondyqtan osy jaǵdaıda basymyz qosylyp, jumyldyrylýy kerek. Bul eldigimiz, memlekettik tutastyǵymyz, Táýelsizdigimiz, halqymyz úshin qajet qadamdar», - dedi Nurlan Orazalın.