Ýkraınanyń Harkov qalasynda Uly Abaıǵa eskertkish ornatylady

NUR-SULTAN. QazAqparat - Qazaqstannyń Ýkraınadaǵy Elshisi Darhan Káletaev Harkov qalalyq keńesiniń hatshysy Igor Terehovpen kezdesti, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Kezdesý barysynda qalanyń ortalyq alańdarynyń birinde Uly Abaıǵa eskertkish ornatý jobasyn talqylap, ony iske asyrý úshin Qazaqstannyń Harkovtaǵy Qurmetti konsýly Emın Nadjaflı bastamasymen, kezdesý ótkizdi.

Kezdesý barysynda belgili músinshi Seıfaddın Qurbanov shyǵarmany «Ómir aǵashy» dep atalatyn trıptıh túrinde usyndy. Kompozıtsııa qazaq, ýkraın jáne ázerbaıjan halyqtarynyń kórnekti ókilderi - Abaı Qunanbaıuly, Grıgorıı Skovoroda jáne Myrza Fatalı Ahýndovtyń músinderinen turady. Olardyń «kórinbeıtin» baılanysy - bul olardyń halyqtarynyń rýhanı-adamgershilik aǵartýyna qosqan orasan zor úlesi, ǵasyrlar boıy synalǵan Otanǵa degen danalyq pen sheksiz súıispenshilik.

Harkovtyń fontandar men jasyl jelektermen qorshalǵan kórkem aýdanynda ornalasatyn eskertkishtiń jalpy bıiktigi - 4 metr. Alań 2 543 sharshy metrdi quraıdy.

D. Káletaev músindik kompozıtsııa baýyrlas halyqtar arasyndaǵy rýhanı baılanysty odan ári nyǵaıtýǵa múmkindik beretindigin, sondaı-aq olardyń mádenıeti men óneriniń keńinen tanylýyna, damýyna jáne yntymaqtastyǵyna yqpal etetindigin atap ótip, qala basshylyǵyna kórsetken qoldaýy úshin alǵysyn bildirdi.

«Biz bul eskertkishti ýkraın halqynyń qazaq halqyna, Qazaqstannyń tarıhy men rýhanııatyna degen qurmeti retinde qabyldaımyz», - dedi Elshi.