Ýkraınanyń halyq depýtaty «Dostyq» ordenimen marapattaldy

KIEV. QazAqparat – Qazaqstan Respýblıkasynyń Ýkraınadaǵy Elshisi Darhan Káletaev Ýkraınanyń halyq depýtaty Ivan Kırılenkoǵa 2 dárejeli «Dostyq» ordenin tabys etti. Bul memlekettik nagrada Qazaqstan men Ýkraına arasyndaǵy dostyq pen yntymaqtastyqty damytýǵa qosqan úlesi úshin berildi, dep habarlaıdy QazAqparat Elshilikke silteme jasap.

Nagradany qabyldaı otyryp, I.Kırılenko Qazaqstan Respýblıkasynyń Prezıdenti Qasym-Jomart Toqaevqa eki el arasyndaǵy baılanysty nyǵaıtýǵa qosqan úlesin joǵary baǵalaǵany úshin alǵys aıtty. Ol bul ózi úshin jáne Qazaqstan men baýyrlas qazaq halqyna jyly lebizben qaraıtyn búkil úlken «ýkraınalyq komanda» úshin úlken mártebe, úlken jetistik ekenin atap ótti.

Sonymen birge, ol birneshe ret Qazaqstanǵa kelip, ınnovatsııalyq damý jolyna negizdelgen eldiń jetistigine árdaıym súısinetindigin basa aıtty. Onyń aıtýynsha, Qazaqstan progresiniń qozǵaltqyshy Elbasy N.Á.Nazarbaevtyń ınnovatsııalyq jáne tereń eseptelgen ıdeıalary, sondaı-aq olardyń dáıekti júzege asyrylýyn qamtamasyz etý qabileti. Ol, sondaı-aq ýkraınalyq túrli «alańdarda» jáne Joǵarǵy Radanyń «qabyrǵalarynda» qazirgi zamanǵy Qazaqstannyń úlgisin mysalǵa keltiretinin qosty.

Halyq depýtaty dostyq pen ózara senimge negizdelgen Qazaqstan-Ýkraına qatynastaryn odan ári damytý úshin barlyq kúsh-jigerin salatynyna sendirdi.