Ýkraınanyń batysynda 550 úı sý astynda qaldy, 83 kópir qırady

KIEV. Ýkrınform-QazAqparat – Ýkraınanyń batysyndaǵy tórt oblysta, 29 maýsym kúngi derek boıynsha, aýa raıynyń qolaısyzdyǵynan 70 eldimeken sý astynda qaldy. Bul týraly Ýkraınanyń Tótenshe jaǵdaılar memlekettik qyzmetiniń baspasóz qyzmeti málimdedi, dep habarlaıdy QazAqparat Ýkrınformǵa silteme jasap.

«70 eldimekende (jalpy 349 bolatyn) 550 úı (14 456 bolatyn), 1 áleýmettik jáne turmystyq sala obektisi (18 edi), 831 jertóle (7 225 bolǵan), 1 898 úı irgesindegi jer telimi (22 182 bolǵan) sý astynda qalyp, 150,5 shaqyrym tasjol qırady (278,2 bolatyn), 582 shaqyrym avtojol (653 bolǵan) men 220 kópir búlindi», - delingen habarlamada.

Jalpy oblys aýmaǵynda 3 adam qaıtys boldy (Ivano-Frankovskaıa oblysy).

TJMQ qyzmetkerleri 2 523 adamdy evakýatsııalady, táýlik ishinde 32 904 tekshe metr sý soryp alyndy (jumys bastalǵaly – 183 244 tekshe metr), turǵyndarǵa 120 kg azyq-túlik (jumys bastalǵaly – 8628 kg) pen 750 l aýyz sý (jumys bastalǵaly – 25 315 l) jetkizildi.

Apat saldaryn joıýǵa 774 adam men 291 tehnıka jumyldyryldy.

Eske sala ketsek, 22-24 maýsym aralyǵynda tolassyz jaýǵan jaýyn-shashynnan Ýkraınanyń Ivano-Frankovskaıa, Chernovıtskaıa, Lvovskaıa jáne Ternopolskaıa oblystarynda sý tasqyny bolǵan edi.