Ýkraınany azat etýge qatystan qazaqstandyq maıdangerdiń súıegi elge jetkizildi

NUR-SULTAN. QazAqparat - Ekinshi dúnıejúzilik soǵys kezinde Ýkraınany azat etý jolynda kúresken qazaqstandyq jaýyngerdiń denesi elge jetkizildi, dep habarlaıdy QazAqparat.

Soǵystan qaza tapqan otandasymyzdyń súıegin týǵan jerge ákelýge uıytqy bolǵan elimizdiń Qorǵanys mınıstrligi. Jaýynger Óksikbaı Bazarbaevtyń súıegi Qazaqstanǵa jetkizilgeni týraly da atalǵan vedomstvo habarlady.

«Ekinshi dúnıejúzilik soǵysy kezinde sheıit bolǵan gvardııa leıtenanty Óksikbaı Bazarbaevtyń súıegi Qazaqstanǵa jetkizildi. Ofıtser atqyshtar vzvodynyń komandıri bolyp, Ýkranınany azat etý jolynda qaza tapqan. 76 jyl ótken soń jaýyngerdiń súıegi áskerı rásimdi saqtaı otyryp týǵan jerinde qaıta jerlenedi», - dep aıtyldy mınıstrlikte ótken baspasóz máslıhatynda.

Sondaı-aq, brıfıngte elimizdegi rezervtegi áskerı qyzmet sharasy sóz boldy.

Óz kezeginde QR Qorǵanys mınıstrligi Uıymdastyrý-jumyldyrý jumystary departamentiniń ókili, podpolkovnık Beıbit Súleımenov atalǵan áskerı sharanyń ne úshin uıymdastyrylatynyn aıtyp berdi.

Odan bólek, mınıstrlik ókili Qazaqstanda rezervtegi áskerı qyzmetkerlerge jalaqy tólene me degen suraqqa jaýap berdi.