Ýkraınamen jumys isteıtin Qazaqstan kásipkerleriniń máselesi qaralýda - «Atameken» UKP
«Eldegi jaǵdaı jalpy turaqty. Biraq ta jaqyn kórshiles eldegi jaǵdaı (Reseı men Ýkraına arasyndaǵy másele) basqasha, soǵys saldaryn bárimiz kórip otyrmyz. Bul suraqqa saıası turǵydan emes, ekonomıkalyq jaǵynan qarasaq, bul ahýal shaǵyn kásipkerge qandaı zııanyn tıgizedi, ıaǵnı sanktsııalar (Reseıge qatysty) Qazaqstanǵa qandaı áser etedi degen másele boıynsha túsindirip óteıin. Kesheden bastap jedel shtab óz jumysyn bastady. Osy eki kún ishinde 200-den astam habarlama kelip tústi. Atap aıtqanda, kóktemgi egin egý jumystaryna daıyndalyp jatqan kásipkerler Ýkraınadan tehnıka bólshekterine jáne basqa ónimderge tapsyrys bergenderin aıtyp jatyr. Bul máselelerdi el óńirlerinen kóterip jatqan kásipkerler bar», - dedi N. Ábilshaıyqov áleýmettik jelidegi onlaın brıfıng barysynda.
Osy oraıda ol kóterilip jatqan máseleler óte mańyzdy ekenin atap ótti.
«Sońǵy 10 kún ishinde kórshiles Reseıge 50-den astam sanktsııa salynǵan. Bul sanktsııany salý úshin bir ǵana qujat kerek, al onyń kúshin joıýǵa birtalaı jyldar qajet. Osyndaı qıyn-qystaý kezeńde Qazaqstan kásipkerleriniń múddesin qorǵaý maqsatynda jedel shtab jumysyn bastady. Keshe tańerteńnen beri bizdiń áriptester árbir oblystaǵy, aýdandaǵy, aýyldaǵy problemalar jaıynda málimet alýda. Osy málimetterdiń barlyǵyn Úkimetke jetkizip jatyrmyz. Sondyqtan bul shtab prblemalardy sheshkenshe jumysyn jalǵastyrady», - dedi N. Ábilshaıyqov.
Budan buryn habarlanǵandaı, AQSh Elshiliginiń baspasóz qyzmeti Reseıge qarsy salynǵan sanktsııalardyń Qazaqstanǵa áseri týraly pikir bildirdi.
«Ýkraınadaǵy jaǵdaı jyldam órbip jatyr. Sondyqtan qazirgi tańda uzaq merzimdi sharalar men olardyń saldary týraly aıtý qıyn. Alaıda, AQSh sanktsııalary Reseı ekonomıkasyna baǵyttalǵanyn jáne basqa elderdiń, sonyń ishinde Qazaqstannyń ekonomıkasyna áserin jumsartý jaǵy eskerilgenin atap ótkimiz keledi. Sondaı-aq aradaǵy áriptestiktiń 30 jylynda biz Qazaqstannyń ekonomıkasyn ártaraptandyrýǵa jáne nyǵaıtýǵa kómektesý baǵytyn ustanyp kelemiz», - delingen Elshiliktiń jaýabynda.
Eske sala keteıik, QR Premer-Mınıstri Álıhan Smaıylovtyń ókimimen QR Úkimeti janyndaǵy Daǵdarysqa qarsy sharalar jónindegi jedel shtab quryldy.