Ýkraınadan tabylǵan mańǵystaýlyq jaýyngerdiń súıegi elge jetkizildi

AQTAÝ. QazAqparat - Ýkraınanyń izdeýshiler toby Jıtomır qalasynyń aýmaǵynda Ekinshi dúnıejúzilik soǵys kezinde qaza tapqan Keńes jaýyngerleriniń súıegin tapty. Olardyń ishinde Mańǵystaý oblysynyń týmasy Seıd Toınashev bar. Jaýyngerdiń múrdesi týǵan jerine jetkizildi, dep habarlaıdy QazAqparat tilshisi.

Keńes jaýyngeriniń súıegin qarsy alý rásimi Mańǵystaý oblysynyń Qorǵanys isteri jónindegi departament ǵımaratynyń aldynda ótti.

Keıin týǵan-týystary «Aqtaý- Eraly» tasjolynyń 20-shaqyrymynda ornalasqan «Qoja - Ata» zıratynda arýlap jerledi.

Seıd Toınashev 1922 jyly Mańǵystaýda dúnıege kelgen.

«Jaqynda Jeńistiń 75 jyldyǵyn atap óttik. Búgingi tańda elimizde birneshe myń soǵys ardageri qaldy. Al, bizdiń óńirde barlyǵy 7 ardager bar. Basqa memleketterdiń elshilikterimen, jergilikti organdardyń izdeý jasaqtarymen birlesip, búgingi tańda sarbazdardyń súıekteri tabylyp, qaıta jerlenýde. Aldaǵy ýaqytta da izdeý jumystary júrgizile beredi», - dedi Mańǵystaý oblysynyń Qorǵanys isteri jónindegi departament bastyǵy Maqsat Tastanov.