Ýkraınadan Polshaǵa jetken 74 qazaqstandyq elge qaıtý úshin kelesi reısti kútip otyr – SІM

NUR-SULTAN. QazAqparat – Ýkraına shekarasynan ótip Polshaǵa jetken 74 Qazaqstan azamaty elge qaıtýǵa úshinshi reısti kútip otyr. Bul týraly Qazaqstannyń Ýkraınadaǵy elshisiniń keńesshisi Sergeı Konovalov málim etti, dep habarlaıdy QazAqparat tilshisi.

«Keshe Almatyǵa 175 otandasymyz jáne búgin Nur-Sultanǵa 124 adam keldi. Osylaısha Ýkraına aýmaǵynan 300 adamdy evakýatsııaladyq. Qazir Polshadaǵy qaýipsiz aımaqta 74 adam bar. Onyń barlyǵy qonaq úımen qamtamasyz etilgen jáne úshinshi reısti kútedi. Biz daıyndap jatyrmyz. Kıevtegi elshilikte 30 adam bar, biraq olar - elshilik qyzmetkerleri emes. Elshimen birge olardyń barlyǵy da azyqpen qamtamasyz etilgen», - dedi Sergeı Konovalov tilshilerge bergen suhbatynda.

Onyń aıtýynsha, qazir Ýkraına shekarasynan ótken qazaqstandyqtardy elge jetkizýdiń qamy jasalýda.

«Sondaı-aq, Harkovtan taǵy 20 adamdy kútip otyrmyz, jaqyn arada evakýatsııalaımyz. Lvovtan bastap, bul - Reseı shekarasyna eń jaqyn qala, jaqyn arada taǵy 15 adam ketedi. Qazir úshinshi evakýatsııalyq reıs daıyndalyp jatyr. Men ondaǵy qazaqstandyqtardy sabyrǵa shaqyramyn. Úshinshi reıs áýe bortyna adam qalaı jınalady, solaı ushady. Kelesi áýe bortynda 142 oryn bolady dep josparlap otyrmyz, osy oraıda «Eır Astanaǵa» alǵysymyz sheksiz», - deıdi ol.