Ýkraınadan oralǵan otandastarymyz beınebaılanysqa shyǵady
Telearna málimetinshe, kúni boıy tikeleı efırde ótetin telekópir barysynda ulttyq arna tilshileri Nur-Sultan men Almaty qalasyndaǵy stýdııalardan, aımaqtardan tikeleı qosylymǵa shyǵyp, qoǵamdaǵy qyzmeti arqyly kópshiliktiń alǵysyna bólenip júrgen qazaqstandyqtar týraly kórsetedi. Qańtar oqıǵasy kezinde halyqqa erikti túrde kómek kórsetken azamattarmen stýdııada tikeleı efırde suhbat qurady.
Telemarafon keıipkerleri arasynda Qańtar oqıǵasy kezinde áýejaıda qalyp qoıǵan beıbit azamattardy úıine jasyryp, buzaqylardan qutqaryp qalǵan almatylyq Dana Súleımenova, Aqtóbedegi túzeý mekemesinen qashpaq bolǵan 20-ǵa jýyq sottalýshyǵa jalǵyz ózi tosqaýyl bolǵan ofıtser Erbol Otarbaev, múmkindigi shekteýli balalardy paralımpıadaǵa daıyndap júrgen Nur-Sultandaǵy «Jas jaýynger» dene shynyqtyrý-saýyqtyrý klýbynyń jetekshisi Sadyq Baıymbetov, qýańshylyq kezinde fermerlerge shóp jóneltken Shymkent qalasynyń turǵyny Qurmet Talapqazy, sal aýrýynyń eń aýyr túrine shaldyqqan balalarǵa tegin emdik massaj jasap júrgen elordalyq Latıf Parpıev, bokstaǵy karerasyn tastap, aýyl balalaryna sport klýbyn salǵan, tegin jattyǵý ótkizip júrgen elordalyq Mıras Masabaev, 50 balany jol apatynan aman alyp qalǵan Pavlodar oblysy Baıanaýyl aýdandyq Іshki ister bóliminiń qyzmetkerleri – polıtsııa starshınasy Murat Nurseıitov pen aǵa serjant Baıanbek Júnisov, 25 jasynda 5 bala asyrap alǵan jambyldyq otbasy Altynaı Tapelova men Baqytjan Alpysbaev, Shyǵys Qazaqstan oblysyndaǵy Kóktal aýylyna kópir salýǵa bastamashy bolǵan semeılik muǵalim Ahat Raqyshev bar.
«Sonymen birge, telemarafon barysynda arnaıy reıstermen Ýkraınadan oralǵan el azamattary beınebaılanysqa shyǵady», - dep atap ótedi telearnadan.
Aıta keteıik, qazaqstandyqtardyń stýdııa qonaqtaryna myna telefon nómirleri (8 (717) 2 75-71-41, 8 778 991 5610) arqyly baılanysqa shyǵyp, alǵys aıtýǵa múmkindigi bar.
Alǵys telemarafony 1 naýryz saǵat 09:30, 11:00, 12:00, 13:10, 15:15, 17:15-te tikeleı efırde ótedi.