Ýkraınadan kelgen bapker Elbasynyń kúrespen qalaı aınalysqanyn aıtyp berdi

NUR-SULTAN. QazAqparat - Qazaqstan halqy Assambleıasynyń XXVII sessııasynan keıin ótken kontsertte Ýkraınada kúresten bapker bolǵan Lev Ejevskıı Nursultan Nazarbaev jas kezinde kúrespen qalaı aınalysqany týraly áńgimelep berdi, dep habarlaıdy QazAqparat tilshisi.

«Bul oqıǵa 1958 jyly bolǵan edi. Bizge Dneprodzerjınskke Qazaqstannan jas jigitter metallýrg mamandyǵy boıynsha bilim alýǵa keldi. Olar ózderiniń kásipterin meńgerip júrgenimen, sportqa da ýaqyt bóldi. Jigitter sektsııalardy tańdap, tarap ketti, ıaǵnı bireýleri voleıbol, basketbolǵa barsa, qalǵandary kúreske moıyn burdy. Sol kezde sportklýbta bapker retinde jumys istep júrgen edim. Jattyǵý sharalaryn baıqap kórgennen keıin, maǵan bir jigit kúrespen aınalasýǵa nıetti ekenin jetkizdi. Men odan aty-jónin suradym. Ol óz kezeginde esimi Nursultan ekenin, buǵan deıin ákesi qazaq kúresine úıretkenin aıtty», - dep eske aldy Lev Ejevskıı.

Sonymen qatar qart bapker sol kezdesýden keıin Nursultan Nazarbaev jattyǵýlardan qalmaı, turaqty túrde kelip turǵanyn atap ótti.

«Ol qaısar ári batyl boldy. Birazdan keıin jarystarǵa da qatysa bastady. Kúresten jaqsy jetistikterdi tanytyp, júldeli oryndardan kórindi. Alaıda onyń ketetin ýaqyty da jetti. Menen «Eger ol sol kezde ketpese, kim bolar edi?» dep surap jatatyndar bar. Men óz kezegimde: «Ol mindetti túrde álem chempıony bolar edi» dep jaýap qaıyramyn», - dedi bapker.