Ýkraınadan Qazaqstan azamattaryn evakýatsııalaýǵa qatysty qansha ótinim boldy

NUR-SULTAN. QazAqparat – QR Syrtqy ister mınıstriniń birinshi orynbasary Shahrat Nuryshev Ýkraınadan Qazaqstan azamattaryn evakýatsııalaý jalǵasyp jatqanyn aıtty, dep habarlaıdy QazAqparat tilshisi.

«Ýkraına aýmaǵynan shekara arqyly osy kúnderi 450-den astam adam evakýatsııalandy. Qazirgi ýaqytta Kıevte, Lvovte bir top jınalyp jatqany aıtyldy. 80-ge tarta adam búgin shekaradan ótedi dep kútilýde», - dedi Sh. Nuryshev Májiliste tilshiler saýalyna jaýap bere otyryp.

Sonymen qatar ol Qazaqstan azamattarynan qansha ótinim kelip túskenin aıtty.

«Konsýldyq qyzmette 1,6 myńǵa jýyq tirkelgen. Evakýatsııa boıynsha 660 adamnan ótinim kelip tústi», - dedi Sharhat Nuryshev.

Budan buryn habarlanǵandaı, Ýkraınadaǵy Qazaqstan Elshiliginde 8 qyzmetker qaldy. Bul qyzmetkerler Qazaqstan azamattaryn elge jetkizý jumystarymen aınalysyp jatyr.