Ýkraınadaǵy jaǵdaı Majarstan men Qazaqstan arasyndaǵy áýe qatynasyn qıyndatqan

NUR-SULTAN. QazAqparat – QR Premer-Mınıstriniń orynbasary – Syrtqy ister mınıstri Muhtar Tileýberdi Reseıge qarsy sanktsııalar Qazaqstan-Majarstan qarym-qatynasyna qalaı áser etkenin aıtty, dep habarlaıdy QazAqparat tilshisi.

«Shynymen de Reseıge qarsy sanktsııalar jahan ekonomıkasyna da, jekelegen elderdiń ekonomıkasyna da áser etip otyr. Sonyń ishinde Majarstanmen aradaǵy saýda-ekonomıkalyq qarym-qatynasymyzda da belgili bir qıyndyqtar sezip otyrmyz. Bárinen buryn bul - tranzıtke, taýar tasymalyna baılanysty qıyndyqtar», - dedi Muhtar Tileýberdi Syrtqy ister mınıstrliginde ótken brıfıngide.

Onyń aıtýyna qaraǵanda, eki el arasynda áýe qatynasynda da kidirister bar.

«Sondaı-aq, eki eldiń astanalaryn baılanystyryp turǵan Wizz Air áýe kompanııasynyń tikeleı reısteri ýaqytsha toqtatylǵan edi. Munyń bári tikeleı Ýkraınadaǵy jaǵdaıǵa baılanysty. Áriptesimniń Qazaqstanǵa jasap otyrǵan saparynyń bir maqsaty - ekijaqty áriptestikti ári qaraı damytýdyń jańa joldaryn, jańa múmkindikterin tabý dep oılaımyn», - dedi Syrtqy ister mınıstri.

Aıta keteıik, Qazaqstannyń Majarstanǵa eksporttaıtyn ónim quny 15,4 mln dollarǵa jetti.