Ýkraınadaǵy Qazaqstan azamattarynyń sany naqtylanyp jatyr - Aıbek Smadııarov

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov Ýkraınada júrgen Qazaqstan azamattaryna qatysty suraqa jaýap berdi, dep habarlaıdy QazAqparat tilshisi.

«Qazirgi kezde Ýkraınada saparmen júrgen Qazaqstan azamattarynyń sanyn tekserip jatyrmyz. Sebebi sońǵy oqıǵalarǵa baılanysty ol eldegi azamattar azaıǵan. Keshe Ýkraınadaǵy bizdiń elshilik kómek kórsetý boıynsha tıisti málimdeme jasady. Bastapqy evakýatsııa kezinde kóbisi ol elden ketip qalǵan edi. Olardyń keıbiri qaıtadan barýy múmkin. Sondyqtan qazir naqty sanyn aıta almaımyn», - dedi A. Smadııarov Úkimet otyrysynan keıin tilshiler saýalyna jaýap bere otyryp.

Onyń aıtýynsha, shekara ashyq bolǵandyqtan, el azamattary Ýkraınaǵa saparmen baryp júr.

«Elshilik jumysyn jalǵastyryp jatyr. Qazir elshilikti jabý emes, ondaǵy qyzmetkerlerimizdi evakýatsııalaý máselesi qarastyrylyp otyr. Taıaý kúnderi osy másele sheshiledi. Atap aıtqanda, evakýatsııa tolyq júrgizilýi múmkin», - dedi resmı ókil.

Budan buryn habarlanǵandaı, Qazaqstannyń Ýkraınadaǵy elshiligi osy elde turatyn qazaqstandyqtarǵa úndeý jasady.