Ýkraınadaǵy Qazaqstan azamattarynyń naqty sany áli belgisiz – SІM

ASTANA. QazAqparat – QR Syrtqy ister mınıstrliginiń resmı ókili Aıbek Smadııarov Ýkraına aýmaǵyndaǵy qazaqstandyqtar týraly naqty aqparat alý qıyn ekeni týraly aıtty, dep habarlaıdy QazAqparat tilshisi.

«Ókinishke qaraı, qazirgi jaǵdaıda ol eldegi Qazaqstan azamattarynyń naqty sany týraly aqparat jınaý qıyn. Óıtkeni evakýatsııalaýdyń alǵashqy tolqynynda, kóktemde ondaǵy qazaqstandyqtar týraly naqty aqparatty bilgen edik. Sol kezde alyp shyqqan azamattardyń keıbir bóligi Ýkrına aýmaǵyna qaıtyp bardy, qaıtadan Qazaqstannan shyǵyp ketti jáne Qazaqstan Elshiligine ózderiniń ornalasqan orny týraly málimdegen joq. Sondyqtan naqty sanyn biz ataı almaımyz. Bizdiń konsýlddyqqa shyqqandarǵa Ýkraına aýmaǵynan shyǵý joldaryn usynamyz. Biraq olar bas tartady. «Osynda qalamyz» deıdi. Biz olardy májbúrleı almaımyz. Olar sonda ómir súredi. Jumystary bar, otbasy sonda», - degen mınıstrliktiń resmı ókili qazir Ýkraınanyń resmı organdarynan anyq málimet alý da qıyn ekenin atap ótti.

«Biz azamattar konsýl esebine turǵanda ǵana naqty sanyn aıtamyz. Beıbit ýaqytta da bul problema bolyp tabylady. Óıtkeni azamattar basqa eldiń aýmaǵynda uzaq merzim boıy ómir súrgende ol týraly málimdeý kerek emes dep esepteıdi. Olar kirip-shyǵyp jatqandaryn aıtpaıdy. Ádette biz jergilikti bılikten málimet alatynbyz. Qazirgi jaǵdaıda sandar aıyrmashylyǵy bolýy múmkin. Ony eshkim baqylamaıdy», - dedi Aıbek Smadııar.