Ýkraınadaǵy Qazaqstan azamattary Varshavaǵa baryp daýys beredi

NUR-SULTAN. QazAqparat – Ýkraınadaǵy Qazaqstan azamattary Polsha elindegi ýchaskede daýys bere alady. Bul týraly QR Syrtqy ister mınıstrliginiń erekshe tapsyrmalar jónindegi Elshisi Jalǵas Ádilbaev aıtty, dep habarlaıdy QazAqparat tilshisi.

«Ýkraınadaǵy qazirgi ahýaldyń qandaı ekenin ózderińiz de jaqsy bilesizder. Sondyqtan azamattarymyzdy der ýaqytynda Qazaqstanǵa jetkizip aldyq. Eger ol jaqta qalǵan azamattarymyz ne týrısterimiz bolsa, onda olar Varshavaǵa baryp daýys bere alady. Osyndaı múmkindik bar. Olar erterek baryp, daýys berýine bolady», - dedi ol Ortalyq saılaý komıssııasynyń otyrysynan keıin baspasóz máslıhatynda.

Onyń atap ótýinshe, Ýkraınadaǵy Elshilik bul jaıynda sol elde júrgen azamattardy aldyn ala eskertti jáne osy baǵytta jumys júrgizip te jatyr. Jalpy, Ýkraına aýmaǵynda daýys berý ýchaskesi ashylǵan joq.

«Elshilik qyzmetkerlerimiz bar. Olar da Varshavaǵa baryp daýys beredi», - dedi Jalǵas Ádilbaev.

Esterińizge sala keteıik, QR Syrtqy ister mınıstrligi 52 shet memlekette 65 ýchaskelik referendým komıssııasyn qurdy. Atalǵan komıssııalardyń barlyq 325 múshesi qashyqtan oqytyldy. Aldyn ala derekterge sáıkes, shamamen 11 350 Qazaqstan azamaty shet elde daýys beredi.