Ýkraınadaǵy áskerı qaqtyǵysty tek kelissóz arqyly sheshýdiń jolyn izdeý kerek – Máýlen Áshimbaev
«Reseıde ishinara mobılızatsııa jarııalanǵany belgili. Osy oraıda túrli suraqtar qoıylyp jatyr. Bul turǵydaǵy bizdiń ustanymyzǵa toqtalsaq, qaqtyǵysty tek kelissóz arqyly sheshýge bolady. Qaqtyǵysty áskerı jolmen sheshýdiń múmkindikteri joq dep esepteımiz. Sondyqtan atalǵan qaqtyǵys bastalǵan birinshi kúnnen bastap Qazaqstannyń ustanymyn jarııalap, onda kelissóz arqyly beıbit jolmen toqtatý ustanymyn aıtyp kelemiz. Atap aıtqanda, bul máselege qatysty bizdiń ustanym ózgermedi. Qandaı qıyn jaǵdaı bolyp jatsa da, búkil emotsııany qoıyp, qaqtyǵysty saıası jolmen sheshýdiń qadamdaryn izdeý kerek», - dedi M. Áshimbaev Senattyń jalpy otyrysynan keıin tilshiler saýalyna jaýap bere otyryp.
Sonymen qatar ol Reseıdegi ishinara mobılızatsııa osy eldiń ishki protsesi ekenin aıta kele, qaqtyǵysqa qatysyp jatqan taraptar bir mámilege, sheshimge keletinine senim bildirdi.
Budan bólek Qazaqstan men Reseı arasyndaǵy sharttarǵa qatysty toqtalǵan Senat tóraǵasy: «osy oraıda Qazaqstanǵa qatysty aıtatyn bolsaq, bul jaǵdaıǵa boıynsha tıisti memlekettik organdar bolyp jatqan úrdisterdi qarap otyr. Ary qaraı jaǵdaıǵa baılanysty aqyldasa otyryp, tıisti máseleler qaralatyn bolady. Jalpy, Qazaqstan men Reseı Eýrazııalyq ekonomıkalyq odaq quramynda. Bizdiń aramyzda kelisimder men sharttar bar. Qujattarǵa sáıkes Reseı azamattary elimizdiń aýmaǵyna saparlap kelse, olarǵa qatysty shekteý joq», - dedi.