Ýkraınada úsh aptanyń demalys kúnderi karantın bolady

KIEV. ÝKRINFORM – QazAqparat – Ýkraınada aldaǵy demalys kúnderi ıaǵnı 14-15 qarashada karantın jarııalanady. Ol 30 qarashaǵa deıin jalǵasady, dep habarlaıdy QazAqparat Ýkrınformǵa silteme jasap.

11 qarashada el úkimetiniń otyrysynda osyndaı sheshim qabylandy.

Densaýlyq saqtaý mınıstri Maksım Stepanov demalys kúnderiniń karantıni úsh apta qatarynan bolýy kerektigin málim etti, ol qarasha aıy aıaqtalyp jeltoqsan túskenshe sozylady.

Demalys kúnderi senbi saǵat 00-den bastap dúısenbi 00-ge deıin jaı kúnderdegi shekteýlerge qosymsha talaptar belgilenedi.

- bar, meıramhana, dámhana, taǵy basqa qoǵamdyq ashanalardyń qyzmeti toqtatylady, taǵamdy tek alyp ketýge ǵana bolady.

- saýda-oıyn-saýyq ortalyq, basqa da kóńil kóterý oryndary istemeıdi.

- turmystyq qyzmet kórsetý sýbektileri jumysyn toqtatady.

Demalys kúnderi mádenı-buqaralyq shara ótkizetin mádenı oryndar jumys istemeıdi. Bul shekteý kıno, vıdeo túsirilim, aýdıovızýal ónim ázirleıtin sharýashylyq sýbektilerine qatysty emes.

Úkimet sport zaldary, fıtnes ortalyqtar men basseın jumysyna tyıym saldy.

Azyq-túlik dúkenderi, qarjy qyzmetin kórsetetin mekemeler, poshta operatory, medıtsına jáne veterınarııa, janarmaı stansasy, avtoservıster jumysyn toqtatpaıdy.