Ýkraınada prezıdent saılaýynyń ekinshi týry ótedi

KIEV. QazAqparat - Ýkraına Ortalyq saılaý komıssııasynyń tóraǵasy Tatıana Slıpachýk prezıdent saılaýynan keıingi daýystardy sanaý túni daýys berý kúnindegideı tynysh ótkenin málimdedi. Bul jaıly ol press-konferentsııa barysynda aıtty, dep habarlaıdy Ýkrınform.

«Biz úshin saılaý kúni ǵana emes, odan keıingi ýchaskelik saılaý komıssııalarynda daýys sanaý kezeńinde júıeli zań buzý faktileriniń kezdespeýi - atap aıtarlyq jaıt», - dedi Slıpachýk.

Ýchaskelik saılaý komıssııalary saılaýshylardyń daýystaryn sanaýdy zańǵa sáıkes júzege asyrdy. Sonymen qatar, OSK tóraǵasy aldaǵy ýaqytta saılaýdyń ekinshi týry ótetinin jáne OSK aldynda qysqa merzimde birinshi týrdy qorytyndylaý jáne 21 sáýirdegi prezıdent saılaýyna qaıtalap daýys berýdi taǵaıyndaý týraly hattamaǵa qol qoıý syndy «aýqymdy tapsyrmalar» turǵanyn atap ótti.

Ýkraınanyń Ortalyq saılaý komıssııasynyń hatshysy Natalıa Bernatskaıanyń aıtýynsha, Ortalyq saılaý komıssııasy qabyldaǵan shaǵymdardyń kópshiligi eleýli buzýshylyqtarǵa qatysty emes jáne jalpy jaǵdaıda qaralady.

31 naýryz kúni Ýkraınada kezekti prezıdent saılaýy ótti. Daýys berý bıýlletenderinde 39 úmitkerdiń esimi kórsetilgen.