Ýkraınada áskerı ushaq apatynan qaza tapqandar sany 26 boldy

KIEV. Ýkrınform - QazAqparat - Ýkraına Qarýly kúshterine tıesili An-26 ushaǵynyń apatynan qaza tapqandar sany 26 boldy, dep habarlaıdy QazAqparat Ýkrınform agenttigine silteme jasap.

Harkovşına aımaǵyna qulaǵan An-26 ushaǵynyń úıindisiniń astynan borttyń jazba quraly tabyldy. Bul jóninde Harkov oblystyq ákimshiliginiń basshysy Alekseı Kýcher aıtqan.

«Borttyń jazba quraly alyndy, biraq áli zerdelengen joq. Bir nárseni anyq bilem - apattan 45 sekýnd nemese bir mınýttaı ýaqyt buryn ushqysh osy reısti basqarýshy pılotpen sóılesken, olar qaýipsiz qoný múmkindigin aqyldasqan» deıdi aımaq basshysy.

Onyń aıtýynsha, bul jazba quraly jaqyn arada zerdelenip, ondaǵy búkil málimetter alynady. Qazir oqıǵa ornynan ushaqtyń qaldyqtaryn áketip, tazalap jatyr.

Aıta keteıik, 25 qyrkúıek saǵat 20.50 kezinde Chýgýev qalasynyń mańynda áskerı áýejaıdan shamamen eki shaqyrym qashyqtyqta An-26 ushaǵy qulap, órtengen.

Bortta 7 ekıpaj múshesi jáne Áýe kúshteri Harkov ulttyq ýnıversıtetiniń 20 kýrsanty, barlyǵy - 27 adam bolǵan. Áskerı ushaqta bolǵan adamdar Ýkraınanyń 11 oblysynan.

Ushý bilim berý baǵdarlamasy sheńberinde ótken bolatyn.

Oqıǵa saldarynan 25 adam qaza tapqan, bir kýrsant aýrýhanada kóz jumdy, taǵy bireýi em alyp jatyr.

Ýkraına prezıdenti Vladımır Zelenskıı 26 qyrkúıekti áýe apatynan qaza tapqandardy eske alýǵa arnalǵan qaraly kún dep jarııalady.

Osyǵan baılanysty Qazaqstan Prezıdenti Qasym-Jomart Toqaev Ýkraına halqynyń qaıǵysyna ortaqtasyp, kóńil aıtty.