Ýkraına JOO-laryna oqýǵa jiberiletin úmitkerler tizimi jarııalandy

NUR-SULTAN. QazAqparat – Bilim berý mekemeleri jáne memlekettik organdar ókilderinen turatyn konkýrs komıssııasy otyrysynyń nátıjesi boıynsha 18 adam Ýkraınadaǵy JOO-larǵa oqýǵa túsýge usynyldy, dep habarlaıdy QazAqparat QR BǴM saıtyna silteme jasap.

«QR Bilim jáne ǵylym mınıstrligi men Ýkraınanyń Bilim jáne ǵylym mınıstrliginiń arasyndaǵy 2010 jylǵy 10 qyrkúıektegi Bilim jáne ǵylym salasyndaǵy yntymaqtastyq týraly kelisim sheńberinde 2020-2021 oqý jylyna Ýkraına úkimeti Qazaqstan azamattary úshin 40 bilim grantyn bóldi.

Bilim berý mekemeleri jáne memlekettik organdar ókilderinen turatyn Konkýrstyq komıssııa otyrysynyń nátıjesi boıynsha 18 adam oqýǵa túsýge usynyldy. Oqý grantyn taǵaıyndaý týraly sońǵy sheshimdi Ýkraına taraby qabyldaıdy», delingen habarlamada.

Aıtar keetrligi, Ýkraınanyń memlekettik bıýdjeti qarajatynyń esebinen oqýǵa usynylǵan úmitkerler 2020 jylǵy 25 tamyz jáne 1 qyrkúıek aralyǵynda Ýkraınanyń joǵary oqý oryndaryna kelip, qajetti qujattardy qaǵaz nusqada tıisti bólimge nemese qabyldaý komıssııasyna tapsyrýy kerek.

Oqýǵa túsýge negiz bolatyn, buryn alǵan bilimi (bilimi jáne biliktiligi) týraly qujat (túpnusqasy men onyń kóshirmesi); oqýǵa túsýge negiz bolatyn, buryn alǵan bilimi (bilimi jáne biliktiligi) týraly qujatqa qosymsha (túpnusqasy men onyń kóshirmesi); pasporttyń kóshirmesi; medıtsınalyq saqtandyrý polısi; 4 fotosýret.

Alǵashqy úsh qujat ýkraın tiline aýdarylyp, notarıaldy kýálandyrylýy tıis.

Atalǵan qujattar resmı kýálandyrylyp, Qazaqstan Respýblıkasyndaǵy Ýkraına Elshiligimen zańdastyrylýy tıis.

Sonymen qatar, úmitkerler ambýlatorlyq jáne statsıonarlyq medıtsınalyq qyzmet kórsetýdi kózdeıtin medıtsınalyq saqtandyrýdy alýy qajet.