Ýkraına Joǵarǵy radasynyń depýtaty qazaq jaýyngeriniń eskertkishine gúl shoqtaryn qoıdy

KIEV. QazAqparat – Ekinshi dúnıejúzilik soǵystaǵy Jeńis kúni qarsańynda Ýkraına Joǵarǵy radasynyń halyq depýtaty, Qazaqstanmen yntymaqtastyq jónindegi parlamentaralyq toptyń múshesi Sergeı Nagornıak Keńes odaǵynyń batyry, qazaq jaýyngeri Serikbaı Mútkenovtyń eskertkishine gúl shoqtaryn qoıdy, dep habarlaıdy QazAqparat tilshisi.

Serikbaı Mútkenov 1913 jyly Pavlodar oblysyna qarasty Aqtoǵaı aýdany burynǵy Chkalov aýylynda qarapaıym sharýa otbasynda dúnıege kelgen. 1942 jyly soǵysqa atandy. Komandır-artıllerıster mektebin bitirgennen keıin 316-shy atqyshtar dıvızııasy, 342-shi atqyshtar polkiniń batareıa komandıri boldy. Ol birinshi Ýkraın maıdanynda, Dneprden ótip keskilesken urystarǵa, Ýkraınanyń qalalary men aýyldaryn fashısterden tazartýǵa qatysty. 1944 jyly qańtarda Cherkassk oblysy Zvenıgorosk aýdanynyń Rızıno aýylynda erlikpen qaza tapty.

Búginde Rızıno aýylynda eldi mekendi jaýdan azat etken batyrlardyń aty-jónderi úlken eskertkishte jáne Jaýyngerlik dańq mýzeıi taqtasynda jazylǵan. Al aýyldyq orta mekteptiń jaýyngerlik dańq bólmesinde batyrlardyń, olardyń arasynda Serikbaı Mútkenovtiń de memorıaldy taqtasy men músini ornatylǵan.

Aǵa serjant Serikbaı Mútkenov 1944 jyldyń 9 aqpanynda KSRO Joǵarǵy keńesi tóralqasynyń jarlyǵymen Keńes Odaǵynyń Batyry ataǵyn alyp, Lenın ordenimen jáne Altyn juldyz medalimen marapattalǵan.