Ýkraına jerinde qazaq jaýyngeriniń súıegi tabyldy

NUR-SULTAN. QazAqparat – Uly Jeńistiń 76-jyldyǵy qarsańynda ýkraın tarapy Donetsk oblysynyń Slavıansk jáne Kramatorsk aýdandaryn azat etý barysynda qaza tapqan qazaqstandyq jaýynger Úkekbaı Bazarbaevtyń súıegin Ýkraınadaǵy Qazaqstan Elshiligi janyndaǵy áskerı attashe Nurjan Omarovqa tabystady, dep habarlaıdy QazAqparat tilshisi.

2020 jyly «Platsdarm» áskerı-tarıhı muralardy zertteýler qaýymdastyǵy» qoǵamdyq uıymy Donetsk oblysy aýmaǵynda soǵys júrgen oryndardan 110 keńestik áskerı qyzmetshiniń súıegin tapqan bolatyn.

Olardyń 8-i tabylǵan medaldar, kapsýlalar, qujat úzindileri arqyly aty-jónderi anyqtaldy. Segiz jaýyngerdiń qatarynda anyqtalǵandardyń biri 1913 jyly dúnıege kelgen qazaq Úkekbaı Bazarbaev bolyp shyqty. Ol 39-shi gvardııalyq atqyshtar dıvızııasynyń 12-shi gvardııalyq atqyshtar polki sapynda soǵysqa qatysqan. Urys barysyndaǵy batyldyǵy úshin «Erligi úshin», «Stalıngradty qorǵaǵany úshin» medaldarymen marapattalǵan.

Qazaqstan Elshiligi Úkekbaı Bazarbaevtyń súıegin Atamekeninde qaıta jerleý úshin týystaryna jetkizetin bolady.