Ýkraına jáne basqa da shıelenis núktelerindegi qantógisti toqtatý áreketi nátıje bermeı otyr – Máýlen Áshimbaev

<p>Ýkraınadaǵy jáne basqa da shıelenis núktelerdegi qantógisti toqtatý áreketi nátıje berer emes. Bul týraly Álemdik jáne dástúrli dinder kóshbasshylary sezi hatshylyǵynyń HHІ otyrysynda Senat tóraǵasy Máýlen Áshimbaev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.</p>

«Din lıderleri tabysty dıalog pen ózara túsinistiktiń úlgisin kórsetse, álemdik saıasatta kelispeýshilikter men qaqtyǵystar artyp keledi. Biz iri derjavalardyń geosaıası básekelestiginiń ósýin jáne halyqaralyq qaýipsizdik júıesiniń erozııasyn kórip otyrmyz. Ókinishke oraı, Ýkraınadaǵy jáne basqa da shıelenis núktelerdegi qantógisti toqtatý áreketi áli de nátıje berer emes. Taıaý Shyǵystaǵy shıelenistiń artýy, beıbit turǵyndar arasynda kóptegen adam qurban bolǵan Palestına-Izraıl qaqtyǵysynyń kúsheıýi bárimizdi alańdatady. Mundaı jaǵdaıda biz janjaldyń odan ári órshýine jáne keńeıýine ákelýi múmkin áreketterge júginbeı, jaǵdaıdy beıbit jolmen sheshýdiń saıası quraldaryn izdeýge shaqyramyz. Sonymen qatar, biz jahandyq strategııalyq syn-qaterlerdi eńserý boıynsha halyqaralyq kúsh-jigerdiń tıimdiligi tómendep jatqanyn kórip otyrmyz», — dedi Máýlen Áshimbaev.

Onyń atap ótýinshe, búgingi ótkir daǵdarystar aıasynda turaqty damý, klımattyń ózgerýi, bıologııalyq qaýip-qater, ıadrolyq qarýsyzdaný, teńsizdik problemasy jáne ózge de irgeli syn-tegeýirinder ekinshi orynǵa syrǵyp otyr.

Foto: Soltan Jeksenbekov/Kazinform

«Osynaý ekzıstentsıaldyq qater qaýpi artyp kele jatyr. Munyń ústine olardy eńserý barsha álemdik qoǵamdastyqtyń birlesken kúsh-jigerin talap etedi», — dedi Senat tóraǵasy.