Ýkraına-Reseı shıelenisi Qazaqstanǵa qalaı áser etedi – sarapshy pikiri
«Qazir Qazaqstannyń ustanymy bárine túsinikti jáne ol qandaı da bir ózgeriske ushyraıdy dep oılamaımyn. Biz neıtralıtet ustanamyz jáne qos tarapty beıbitshilikke shaqyramyz. Bul ustanymdy Senat spıkeri Úkimet deńgeıinde aıtqan bolatyn. Ol birinshi kezekte, kópvektorly qaǵıdatty ustanatyn Qazaqstannyń syrtqy saıasaty tujyrymdamasynda negizdelgen. Bul barlyq taraptarmen odaqtastyq qatynas baryn bildiredi. Biz úshin balansty saqtaý óte mańyzdy, óıtkeni bul buryn-sońdy bolmaǵan óte kúrdeli geosaıası jaǵdaı. Munda Qazaqstan shalt qadamǵa barmaýy kerek, qandaı da bir tarapty jaqtamaýy kerek. 30 jyl boıy biz kópvektorly júıeni qoldanyp keldik jáne ol bizge tek artyqshylyqtar berdi. Sondyqtan qazirgi jaǵdaıǵa tek ulttyq múddelerimizdi eskere otyryp ún qatý kerek. Bizde Qazaqstanda Reseımen týystyq baılanysy bar 3 mln-nan astam orys, Ýkraınamen baılanystyratyn 300 myńnan astam ýkraın bar. Negizinen, barlyǵymen dıplomatııalyq qatynastar ornatylǵan. Sondaı sezimtal shekarany saıasatkerlerimiz eshqandaı jaǵdaıda buzbaýy kerek. Qoǵamymyz da oqıǵany baǵalar kezde, qandaı da bir tarapty jarııa túrde qatań synaýda saq bolǵany jón. Ony ózimizdiń jeke emotsııalarymyzdan emes, ulttyq múddelerimizdi saqtaýdan bastaýymyz kerek», - dep túsindirdi sarapshy.
Óz pikirinde Juldyzaı Ysqaqova Qazaqstan bıliginiń ustanymy aqylǵa qonymdy dep sanaıdy.
«Bıliktiń ustanymyn syndarly dep aıtýǵa bolady. Qaýipsizdik Keńesiniń otyrysy ótti, ujymdyq sheshim qabyldandy, meniń oıymsha, beıtaraptyq ustanym men taraptardy dıalogqa shaqyrý – óte oryndy. Bizdiń jaqsy tájirıbemiz bar – Sırııa protsesi Qazaqstanda ótken bolatyn. Kezinde Reseı men Túrkııany da kelissózder ústeline otyrǵyzdyq. Osyndaı janjaldardyń medıatory retinde jıi bastama kóterdik. Meniń oıymsha, bul taktıka óte durys. Bizdiń mindetimiz – taraptar qaqtyǵysty dıplomatııalyq deńgeıde sheshý úshin barlyq múmkindikti paıdalaný», - dedi sarapshy.
Sondaı-aq, sarapshy Reseı-Ýkraına qaqtyǵysynyń qashanǵa sozylatyny týraly pikir bildirdi.
«Soǵystyń merzimi týraly kesip aıtýǵa bolmaıdy, biraq sońǵy onjyldyqta baýyrlas memleketter qarym-qatynasy dál osylaı shıelenispegen edi. Soǵystyń ózinen buryn keıingi saldary uzaqqa sozylady. Munyń saldary búkil postkeńestik keńistikti sharpýy múmkin. Qazir bizdiń mindetimiz – eń nashar stsenarııge daıyndalý, árıne oqıǵa basqasha órbýi de múmkin. ıAǵnı, biz azamattarymyzdy barynsha qorǵaý úshin daǵdarysqa qarsy sharalar qabyldaýǵa tıispiz. Qazir Úkimetke úlken ról júktelgen – olar ázirlegen daǵdarysqa qarsy jospardy únemi tekserip otyrýy kerek, óıtkeni jaǵdaı ózgerip, Reseıge jańa sanktsııalar salynyp jatyr. Onyń bárine daıyn bolýymyz kerek. Úkimettegi sarapshylarymyz oqıǵanyń túrli boljamyna súıendi jáne daıyndyqty pysyqtap jatyr», - dep esepteıdi sarapshy.
Spıker Qazaqstan úshin Reseı-Ýkraına janjalynyń qandaı saldary bolýy múmkin ekenin aıtty.
«Bılik biz múshelik etetin UQShU kontıngenti bul protsesterge qatyspaıdy dep málimdedi, óıtkeni bul oqıǵa memlekettik kelisimde bolmaǵan. Muny BUU sheshýi kerek. Bul turǵydaǵy másele sheshildi. Taǵy bir nárse – bul halyqqa ekonomıkalyq turǵydan, ıaǵnı ınflıatsııamen, teńge baǵamymen baılanysty áser tıgizýi múmkin. Munyń bári, árıne, azamattardyń ekonomıkalyq jaǵdaıyna áser etedi. Bizde rezervter men Ulttyq qor bar. Bıliktiń málimdemesine súıensek, munaı aqshasy Ulttyq qorda saqtalǵan. Sondyqtan bizde «qaýipsizdik jastyqshasy» bar. Bıýdjet pen resýrstarymyz bar. Munda dúrbeleńge boı aldyrmaı, resýrstardy durys bólý kerek. Bul jaǵdaıda sybaılas jemqorlyqqa qarsy organ, quqyq qorǵaý organy naqty jumys isteýi kerek. Qaýipsizdik – birinshi orynda, sodan keıin – ekonomıka, sondyqtan azamattar osyndaı kúrdeli geosaıası jaǵdaılarda ózderiniń qorǵalǵanyn sezinýi tıis», - dedi Juldyzaı Ysqaqova.