Ýkraına radıosynda «Meniń Qazaqstanym» baǵdarlamasy shyǵyp turady
«Meniń Qazaqstanym» atty baǵdarlamanyń ashylýyna Kıevtegi qazaq dıasporasy uıytqy bolǵan. Baǵdarlama ár sársenbi saıyn turaqty túrde efırge shyǵyp turmaq.
Ýkraınanyń «Otchızna» qoǵamdyq ınternet-radıosynyń álemniń 20-ǵa jýyq elinde 10 myńnan astam tyńdaýshysy bar. Jumysyn jarty jyl buryn ǵana bastaǵan jeli aqparattyq-tanymdyq, mádenı, qoǵamdyq jáne quqyqtyq baǵytta baǵdarlama taratady. Bastapqyda radıo álemniń ár jerinde turatyn Ýkraına azamattaryna arnalǵan bolatyn. Bertin kele Ýkraınada ómir súrip jatqan ózge ult ókilderine de efır ýaqyty bóline bastady.
Al 2 qyrkúıek kúni radıoda «Meniń Qazaqstanym» jobasy alǵash ret efırge shyqty. Tikeleı efırde ulttyń uly aqyny Abaıdyń óleńi oqyldy.
«Meniń Qazaqstanym» jobasy turaqty túrde shyǵyp turatyn bolady. Búgingi efır tanymdyq baǵytta ótti. Keleside qazaq halqynyń salt-dástúri, mádenıeti men elimizdegi sońǵy jańalyqtarmen bólisip otyrmaqmyz. Ýkraına men Qazaqstan arasyndaǵy mádenı baılanys jaıly da aqparat aıtylady. Aldaǵy ýaqytta Ýkraına jerindegi tanymal qazaq azamattary, onyń ishinde mýzykant jáne sport salasynda aıtarlyqtaı jetistikke jetken qazaq jerlesterimiz jaıly málimet aıtyp, efırge qonaqqa shaqyratyn bolamyz», - dedi jobanyń avtory jáne júrgizýshisi Marık Janǵutınov.
«Otchızna» radıosynyń negizin qalaýshy jáne onyń aǵa redaktory Ivan Kokýtsanyń aıtýynsha, mundaı baǵdarlama Ýkraına-Qazaqstan arasyndaǵy dostyq qarym-qatynasty arttyrýǵa sep bolady.
«Meniń Qazaqstanym» jobasynyń efır ýaqyty - 45 mınýt. Ár sersenbi saıyn Kıev ýaqyty boıynsha saǵat 17.00-de, al Astana ýaqytymen keshki 20.00-de efırge shyǵady.