Ýkraına karantındik shekteýlerdi 2021 jylǵy aqpannyń sońyna deıin uzartty

KIEV. ÝKRINFORM – QazAqparat – Ýkraınanyń mınıstrler kabıneti eldegi karantın rejımin 2021 jyldyń 28 aqpanyna deıin uzartty. Tıisti qaýly 9 jeltoqsan kúni Úkimet otyrysynda qabyldandy, dep habarlaıdy QazAqparat Ýkrınform saıtyna silteme jasap.

«El aýmaǵyndaǵy tıisti karantındik shekteýlerdi 2021 jyldyń 28 aqpanyna deıin uzartýdy usynamyz. Onymen qosa, áli de kúshin joǵaltpaǵan tótenshe jaǵdaı rejımi, sondaı-aq 28 aqpanǵa deıin uzartylady. Biz usynyp otyrǵan shekteýler elimizdiń búkil aýmaǵy enip otyrǵan «qyzǵylt sary aımaq» shekteýlerine sáıkes keledi», - dedi Densaýlyq saqtaý mınıstri Maksım Stepanov.

Usynylyp otyrǵan ózgeristerge toqtalsaq: qoǵamdyq tamaqtaný oryndarynyń jumys ýaqyty 23.00-ge deıin uzartylady. Alaıda, esep aıyrysý operatsııalary 22.00-de toqtatylady.

Qańtar aıynyń sońy men aqpan aıynyń basynda tumaýmen jáne JRVI-men syrqattaný dástúrli túrde artatyny eskerile otyryp, 8 qańtar saǵat 00.00-den bastap, 25 qańtar saǵat 00.00-ge deıin qatań karantındik shekteýler engizý usynylǵan.

Jańa jyl túninde tamaqtaný oryndaryna túngi saǵat 01.00-ge deıin ǵana jumys isteýge ruqsat berilmek.

Qalaaralyq jáne halyqaralyq jolaýshylar qatynasyn toqtatý josparlanyp otyrǵan joq.

9 jeltoqsandaǵy jaǵdaı boıynsha, Ýkraınada koronavırýs ınfektsııasynyń 845 343 oqıǵasy zerthanalyq túrde rastalǵan. Sonyń ishinde 12 585-i sońǵy táýlikte ǵana anyqtalǵan.