Ýkraına Elshisiniń blogerge suhbaty: Dıplomat ​​QR SІM-ge shaqyryldy

NUR-SULTAN. QazAqparat – Qazaqstan Respýblıkasy Syrtqy ister mınıstrliginde mınıstrdiń orynbasary Ermuhambet Qonyspaev Ýkraınanyń Qazaqstandaǵy Elshisi Petr Vrýblevskıımen kezdesti, dep habarlaıdy QazAqparat.

«Kezdesý barysynda Elshige bıylǵy 21 tamyzda qazaqstandyq bloger Dıas Quzaıyrǵa bergen suhbatynda aıtqan málimdemelerine baılanysty narazylyq bildirildi.

Qazaqstan tarapy mundaı málimdemelerdiń shet memleket elshisiniń qyzmetine saı kelmeıtindigi jáne qolaısyzdyǵy týraly ustanymyn bildirdi. Mundaı is-qımyldar memleketter arasyndaǵy dostyq qatynastarǵa nuqsan keltirmeýge tıis», - delingen QR SІM baspasóz qyzmetiniń málimetinde.

Buǵan deıin Qazaqstan halqy Assambleıasy Ýkraına elshisi Petr Vrýblevskııdiń bloger Dıas Quzaıyrǵa bergen suhbatynda Reseıge qatysty sózderin aıyptaǵan bolatyn.

«Biz, Qazaqstan halqy Assambleıasynyń músheleri, Qazaqstan Respýblıkasyndaǵy Ýkraına elshisi Petr Vrýblevskıı myrzanyń qazaqstandyq blogerlerdiń birine bergen suhbatynda aıtqan sózderin qatań aıyptaımyz jáne ondaı saryndaǵy málimdelerge jol berýge bolmaıdy dep sanaımyz. Beıbitshilik pen birlik bizdiń memlekettik saıasattyń jáne qoǵamdyq birigýdiń basty qaǵıdalary. Sondyqtan mundaı pikirdi kim aıtsa da bizdiń qarsylyǵymyzǵa ushyraıdy», - delingen Assambleıa habarlamasynda.

Sonymen qatar uıym dıplomatııa – óshpendilik pen arazdyqty qozdyrý úshin emes, beıbitshilik pen yntymaqtastyq ıdealdaryna qyzmet etýi tıis ekenin jetkizgen edi.

Foto : gov.kz