Ýkraına aýmaǵynda QR azamaty qaqtyǵysqa qatysqany týraly resmı aqparat alǵan joqpyz — Aıbek Smadııarov
«Biz Ýkraınanyń quzyretti organdarynan Qazaqstan azamattarynyń ustalýy nemese Ýkraına aýmaǵynda qarýly qaqtyǵysqa qatysýy týraly resmı aqparat alǵan joqpyz. Osy rette ózderińiz biletindeı, mundaı áreketter Qazaqstan zańnamasyna sáıkes, qylmystyq jaýapkershilikti kózdeıdi», - dedi ol brıfıngide.
Sondaı-aq, ol qozǵalys erkindigi – Qazaqstan azamattarynyń ajyramas quqyǵy ekenin eske saldy.
«Qazaqstan zańnamasyna sáıkes, qyzmetti mindetterin oryndaýǵa, qylmystyq jaýapkershilikke, sot sheshimin oryndaýǵa nemese taǵy basqa tıisti sebepterge baılanysty Qazaqstannan tys jerlerge shyǵýǵa birqatar shekteýler bar. Memleket soǵys qımyly ótip jatqan aýmaqtarǵa barmaýǵa tek keńes bere alady. Biraq mundaı jaǵdaıda da tańdaý quqyǵy azamattardyń ózinde qalady. Saldary úshin ózi jaýap beredi», - deıdi SІM resmı ókili.
Aıbek Smadııarov Ýkraına zańnamasy Qyrym sekildi aýmaqtarǵa barýǵa tyıym salatynyn eskertti.
«Ýkraına tarapy Eýropa aýmaǵyndaǵy elderge buzýshynyń shengen aýmaǵyna kirýge tyıym salýǵa da ótinish jasaýǵa quqyly. Ýkraına bıliginiń ruqsatynsyz Qyrym aýmaǵyna jáne basqa da daýly aýmaqtarǵa barǵan qazaqstandyqtar Ýkraınanyń basyp alynǵan aýmaqtarynyń mártebesi týraly zańbuzýshy bolyp tabylady. Osyǵan baılanysty olarǵa Ýkraınanyń da, basqa seriktes elderdiń de sanktsııalary qoldanylýy múmkin. Keıbir jaǵdaılarda qylmystyq qýdalaý da, halyqaralyq izdeý de yqtımal», - dedi vedomstvo ókili.
Foto: api.theins.info