Ýkraına aýmaǵynda 200-ge jýyq Qazaqstan azamaty bolýy múmkin

ASTANA. QazAqparat – QR Premer-Mınıstriniń orynbasary - Syrtqy ister mınıstri Muhtar Tileýberdi qazirgi kezde Ýkraınada júrgen Qazaqstan azamattary jaıynda aıtty, dep habarlaıdy QazAqparat tilshisi.

«Qazirgi jaǵdaıda aqparat jınaý óte qıyn. Áskerı qaqtyǵys júrip jatqanyn jáne adamdardyń birazy Ýkraınadan óz betinshe ketip jatqanyn eskersek, tıisti esepteýlerdi júrgizý qıynǵa túsip otyr. Degenmen, Qazaqstan azamattarynan ótinishter kelip jatyr. Konsýldyń paıymynsha, Ýkraına aýmaǵynda 200-ge jýyq azamat bolýy múmkin», - dedi M. Tileýberdi Senatta tilshiler saýalyna jaýap bere otyryp.

Syrtqy ister mınıstri adamdardyń negizgi bóligi Qazaqstanǵa kelgenin aıtty.

«Polsha men Moldovaǵa evakýatsııalaý úshin shekaralar ashyq. Shekaradan ótkende bizdiń elshilik kómek kórsetedi», - dedi M. Tileýberdi.

Budan buryn habarlanǵandaı, mınıstr Kıevtegi Qazaqstan elshiligin tolyqtaı kóshirý máselesi qarastyrylmaǵanyn atap ótti.

«Kıevte bizdiń konsýl qaldy. Ol kún saıyn Ýkraınadaǵy azamattarymyzdy qabyldap otyr. El azamattary túrli másele boıynsha kómek surap kelip jatyr. Elshilikti tolyqtaı kóshirý nemese ýaqytsha jabý máselesi qaralyp otyrǵan joq», - dedi mınıstr.