Ýkraına ásker sanyn úsh jylda 100 myń adamǵa ulǵaıtpaq

KIEV. Ýkrınform - QazAqparat – Ýkraına Prezıdent Vladımır Zelenskıı eldegi Qarýly Kúshter sanyn aldaǵy úsh jylda 100 myń adamǵa ulǵaıtý týraly jarlyqqa qol qoıdy. Bul týraly QazAqparat Ýkrınform aqparat agenttigine silteme jasap habarlaıdy.

Qujat týraly toǵyzynshy shaqyrylǵan Joǵarǵy Radanyń jetinshi sessııasynyń ashylýynda aıtyldy.

«Ýkraına Prezıdentiniń memlekettiń qorǵanys qabiletin jáne áskerı qyzmettiń tartymdylyǵyn nyǵaıtý týraly jarlyǵy ázirlendi. Bul jarlyq barlyq áskerı qyzmetshilerdi materıaldyq qamtamasyz etýdi eń tómengi jalaqynyń úsh mólsherinen tómen emes deńgeıge deıin arttyrýdy kózdeıdi. Ýkraınanyń kásibı armııanyń negizine kóshýi, ofıtserler mansabynyń ósýi, sondaı-aq aldaǵy úsh jylda Ýkraına Qarýly Kúshteriniń kásibı armııasynyń 100 myń adamǵa ulǵaıýy úshin júıe ázirlendi», - dedi Prezıdent.
Sonymen qatar, Ýkraına Qarýly Kúshteriniń qosymsha 20 brıgadasyn qurý máselesi tur. «Bul jarlyq Ýkraınanyń kásibı armııaǵa kóshýiniń bastamasy bolyp tabylady. Bul jarlyq jaqyn arada soǵys bolatyny úshin emes, Ýkraınada beıbitshilik bolýy úshin jasalǵan», - dedi Vladımır Zelenskıı.