Úkimette tótenshe jaǵdaılarǵa den qoıý máseleleri talqylandy
Keńes otyrysynda úsh negizgi másele talqylandy: TJ jaǵdaıynda jedel den qoıý úshin respýblıkalyq jáne óńirlik shtabtardyń ókilettikterin keńeıtý, tehnıka men jabdyqtardy tasymaldaý tetigi, sondaı-aq tabıǵı apattar kezinde múlikti saqtandyrý.
Vıtse-premer halyq pen bızneske keltirilgen zalaldy óteý kezinde týyndaǵan problemalardy erekshe atap ótti. Qanat Bozymbaev Qarjy, TJ, Eńbek jáne halyqty áleýmettik qorǵaý mınıstrlikterine zardap shekkenderge ótemaqy tóleý tártibin qaıta qaraýdy tapsyrdy.
Ulttyq ekonomıka mınıstrliginiń derekteri boıynsha shaǵyn jáne orta bıznes (ShOB) sýbektilerinen jalpy somasy 3,4 mlrd teńgege 291 ótinim kelip tústi. Qarajat qazirdiń ózinde óńirlerge Úkimettiń rezervinen bólindi, biraq ótinish berýshilerdiń úshten birine ǵana jetti. Osyǵan baılanysty vıtse-premer «Atameken» Ulttyq kásipkerler palatasynyń eskertýlerin nazarǵa ala otyryp, bızneske tólem jasaýdyń ádistemesin pysyqtaýdy, onyń ishinde AÓK kásipkerlerine keltirilgen zalaldy óteýdi tapsyrdy.
«Mundaı bıýrokratııa turǵyndar arasynda narazylyq týdyrady. Osy jaǵdaıdy anyqtaý úshin bul isti qolǵa alamyn. Biz sý tasqyny týraly emes, sý tasqyny mysalynda áreket etý júıesiniń daıyndyǵy týraly aıtyp otyrmyz. Biz TJ-ǵa tez den qoıyp, zardap shekken azamattar men ShOB úshin qajetti kómekti jedel jetkizýimiz kerek. Jumys tobyn quryp, barlyq rásimderdi jeńildetińizder», - dedi Premer-Mınıstrdiń orynbasary.
Sý tasqyny kezinde tehnıkanyń jetispeýshiligi máselesi týyndady. Ony basqa oblystardan kóshirý boıynsha jedel sharalar qabyldandy. Birqatar óńirde ákimder qolda bar avtopark sany týraly aqparatty bilmedi, sondyqtan arnaıy esepke alýdy jolǵa qoıý qajet.
«Kólik mınıstrligi osy talqylaýdy eskere otyryp, tehnıkany, onyń ishinde jeke uıymdarmen tıeý, jetkizý jáne túsirý algorıtmin pysyqtaýy qajet. Olardy TJ aımaqtaryna tartý jáne jetkizý úshin shyǵyndardy óteý tetigin kózdeý kerek. Munyń bárin zańnamalyq turǵydan rettep, bir aı merzimde kelisilgen usynystar engizý qajet», - dep atap ótti Qanat Bozymbaev.
TJ kezinde azamattardyń múlkin saqtandyrý máseleleri jáne apattar oblıgatsııasyyn shyǵarý múmkindigi qaraldy. Qarjy naryǵyn retteý jáne damytý agenttigi apatty táýekelderdi saqtandyrýdyń ártúrli modelderi men tájirıbelerine taldaý júrgizedi. Halyqaralyq tájirıbeni zerdeleý boıynsha óz taldaýyn «Astana» halyqaralyq qarjy ortalyǵy da júrgizdi. Vıtse-premer Ulttyq ekonomıka jáne qarjy Mınıstrlikterine QNRDA jáne AHQO-men birlesip bir aı merzimde apatty bondtar shyǵarý jáne múlikti saqtandyrý boıynsha qajetti esepteýler júrgizýdi tapsyrdy.
«Biz búgin bıylǵy sý tasqyny boıynsha qorytyndy jasap, kelesi jyldyń sý tasqyny kezeńine daıyndyqty bastaý úshin arnaıy jınaldyq. Qazir biz turǵyn úıdi qalpyna keltirý jáne zalaldy óteý boıynsha barlyq jumysty ýaqtyly aıaqtaýymyz kerek. Eń bastysy, zardap shekkender kúzge deıin baspanamen qamtamasyz etilýi kerek. Kóktemge deıin áli alys. Biraq sý tasqyny kezeńine daıyndyq sharalary kúzde aıaqtalýy kerek. Sý tasqyny qatelikti, oryndalmaǵan jumystardy jáne jetkiliksiz qarjylandyrýdy keshirmeıdi», - dep atap ótti vıtse-premer.
Qanat Bozymbaev TJ men sý resýrstary jáne ırrıgatsııa Mınıstrlikterine sý tasqynyna daıyndyq jáne halyqty apattardan qorǵaý algorıtmin ázirleýdi tapsyrdy. Oblys ákimdikteri – sý tasqynynyń aldyn alý sharalaryn qamtamasyz etedi, gıdrotehnıkalyq jáne qorǵanys qurylystaryn tekserip, aınalma arnalardy daıyndaıdy. Qarjy mınıstrligi – ár óńirde tótenshe rezerv qurý jóninde usynystar engizýi tıis. Ol turaqty, tómendetilmeıtin, kelesi jylǵa aýysatyn jáne tek tótenshe jaǵdaılarda qoldanylýy kerek.