Deklaratsııa tapsyrýdan qaı sanattaǵy azamattar bosatylady

<p>ASTANA. KAZINFORM &ndash; Búgin Úkimet otyrysynda Qarjy mınıstri Mádı Takıev deklaratsııa tapsyrýdan bosatylatyn sanatty atady.</p>

«Qazaqstanda jeke tulǵalardyń tabystary men múlkin jalpyǵa birdeı deklaratsııalaý júıesin engizý 2021 jyldan bastap kezeń-kezeńimen iske asyrylyp jatyr. Yńǵaıly bolý úshin salyq tóleýshiniń kabıneti, «Elektrondyq úkimet» veb-portaly, «e-Salyq Azamat», «eGov mobile», «Halyk», «Bank Tsentr kredıt» jáne «Kaspi» mobıldi qosymshalary arqyly, deklaratsııalardy tapsyrý boıynsha elektrondyq servıster iske qosyldy. Búgingi tańda alǵashqy úsh kezeńniń nátıjesinde, jalpyǵa birdeı deklaratsııalaý júıesine 4,8 mln adam, onyń ishinde memlekettik qyzmetshiler, kommertsııalyq uıymdardyń, kvazımemlekettik sektordyń basshylary men quryltaıshylary jáne olardyń jubaılary kirdi. 2025 jyldan bastap deklaratsııalardy usyný boıynsha mindettemeler azamattardyń qalǵan sanatynda týyndaıdy. Bul - shamamen 8 mıllıon adam», - dedi mınıstr.

Onyń atap ótýinshe, jalpyǵa birdeı deklaratsııalaý tujyrymdamasy qabyldanǵannan beri 14 jyl ótti. Osy ýaqyt ishinde:

• memlekettik organdar men ýákiletti uıymdardyń derekqorlary tsıfrlandyryldy;
• qolma-qol aqshasyz tólemderdiń úlesi 86 paıyzǵa jetti;
• qarjylyq jáne valıýtalyq baqylaý kúsheıtildi;
• halyqaralyq kelisimder (Strasbýrg konventsııasy, Fatsa, TMD – 100-den astam el) aıasynda qarjy shottary boıynsha derekter almasý jolǵa qoıyldy;
• tsıfrlyq qyzmetter keń taraldy.

«Osyǵan baılanysty, avtomattandyrylǵan salyqtyq baqylaý múmkindikterin eskere otyryp, jáne Memleket basshysynyń jalpyǵa birdeı deklaratsııalaý tásilderin qaıta qaraý týraly tapsyrmasyn iske asyrý maqsatynda, osy sanattaǵy 4 kezeńge kiretin azamattardyń aktıvteri men mindettemeleri týraly deklaratsııalardy tapsyrýdan bosatý usynylady. Olar: jeke qurylymdardyń qyzmetkerleri, zeınetkerler, úı sharýasyndaǵy áıelder, stýdentter jáne basqalary. Bosatý rásimi osy sanattaǵy jeke tulǵalardyń 90 paıyzdan astamyn qamtıdy», - dedi ol.

Bul rette Mádı Takıevtiń atap ótýinshe, deklaratsııalaýdy kelesi tulaǵalarǵa qaldyrý usynylady:

• memlekettik qyzmetshiler;
• kommertsııalyq uıymdardyń, kvazımemlekettik sektordyń basshylary men quryltaıshylary jáne olardyń jubaılary;
• Qazaqstan Respýblıkasynan tys jerlerde aktıvteri barlarǵa jáne 1 jyl ishinde satyp alǵandarǵa;
• bir jyl ishinde quny 20 000 aılyq eseptik kórsetkishten (74 mln. teńge) astam satyp alýlar jasaǵandarǵa;
• óz betinshe salyq salynatyn tabys tapqandarǵa.

«Budan basqa, azamattarǵa erikti túrde deklaratsııalaý quqyǵy beriletin bolady. Salyqtyq baqylaýǵa keletin bolsaq, jeke tulǵalardyń qolda bar aktıvterin tirkeý úshin barlyq tsıfrlyq derekqorlardan, onyń ishinde ekinshi deńgeıdegi bankterden málimetter alý tetigi qamtamasyz etiletin bolady. Tıisti zańnamalyq túzetýler daıyndaldy», - dedi mınıstr.

Eske salsaq, buǵan deıin Prezıdent deklaratsııalaýǵa qatysty máseleni jan-jaqty pysyqtaýdy tapsyrdy.