Úkimetke jalpy kóńilimiz tolady, biraq olqy tustar bar - Elnur Beısenbaev
«Bizde 20 óńirde arnaıy jasalǵan baǵdarlamalar jáne bir respýblıkalyq baǵdarlama toptamasy bar. 20 óńirlik baǵdarlamanyń júzege asýyna 5 jylda 30 trln teńge qarajat ketedi. Onyń ishinde jergilikti bıýdjet bar, respýblıkalyq transfertter bar, óńirlerdiń ınvestıtsııalyq jobalary da sonyń ishine kiredi. Oǵan qosa respýblıkalyq baǵdarlamamyz bar. Onyń aıasynda jyl saıyn memlekette qaralyp jatqan bıýdjettiń shamamen 45-50 paıyzy osy Amanat partııasynyń baǵdarlamasyn oryndaýǵa baǵyttalady», - dedi E. Beısenbaev Jibek joly telearnasynyń «Ýáde» baǵdarlamasynda.
Partııa ókili bıyldan bastap jańa saıası dástúr qalyptasqanyn, Parlamentte kópshilik daýysqa ıe bolǵan, ıaǵnı saılaýda aıqyn jeńiske jetken saıası partııanyń ókilderi endi Úkimet basshysyn usynatynyn eske saldy.
«Biz Úkimet basshysyn usyndyq. Tek qana usynyp qoımaı, osy shaqyrylymnyń bastalýynyń aldynda, Joldaýǵa bir kún qalǵanda Úkimet basshysy bizdiń fraktsııaǵa kelip, Amanat baǵdarlamasynyń oryndalýy, qaı jerinde olqy tustar bar, qaı jerdegi ýádelerimizdi oryndaı almaý qaýpi bar degen suraqtardy talqylady. Úkimetke jalpy kóńilimiz tolady, biraq olqy tustary da bar. Ótkende ózimizdiń synymyzdy aıttyq, syn bolmasa da jumys júrmeıdi. Iá, aıtylatyn másele kóp. Mysaly MÁMS júıesi qoǵamdaǵy úlken dertke aınaldy. Jol toraptarynyń qurylysy, Almaty-Astana arasyndaǵy, Atyraý-Astrahan arasyndaǵy úlken joldardyń salynbaýy, mektep qurylysynyń ýaqytyly aıaqtalmaýy sekildi problemalar bar. Bizdiń aqparatymyz boıynsha, 50-den asqan mektepterdiń jóndeý jumysy turalap qalǵan, biz ony baqylaýǵa alamyz», - dep túsindirdi Elnur Beısenbaev.