Úkimet janynan Alataý qalasyn damytý jónindegi Jobalaý keńsesi iske qosyldy

<p>ASTANA. KAZINFORM &mdash; Úkimette Alataý qalasyn damytý jónindegi jobalaý keńsesiniń birinshi otyrysy ótti, ony vıtse-premer Qanat Bozymbaev basqardy. Bul týraly Úkimettiń baspasóz qyzmeti málimdedi.&nbsp;</p>

«Memleket basshysy Alataý qalasyn qurý qarqynyn jedeldetý mindetin qoıdy. Osy aptada Premer-Mınıstrdiń ókimimen Jobalaý keńsesi quryldy. Ol jetekshilik etetin salalar boıynsha derbes jaýapkershilikti aıqyndaı otyryp, jobalyq tásil negizinde negizgi sheshimder qabyldaýǵa arnalǵan alańǵa aınalady. Qalany qurýdyń alǵashqy nátıjeleri dál 6 aıdan keıin usynylýy kerek. Bastapqy máre – búgin», — dep atap ótti Qanat Bozymbaev.

Jobalaý keńsesi otyrysyna qatysýshylar zańnamaǵa qajetti ózgerister engizý jáne ınvestorlar tartý rásimderin jeńildetý syndy negizgi jumys baǵyttaryn anyqtady.

«Sheteldik ınvestorlardyń negizgi tilekteriniń biri – «bir tereze» qaǵıdaty boıynsha qyzmet kórsetý, ınvestıtsııalyq tsıkl boıy qoldaý jáne servıstik qyzmet kórsetý. Almaty oblysynyń ákimdigi men SІM Investıtsııa komıteti Alataýda osyǵan saı ekojúıe qurýy qajet», — dep atap ótti Qanat Bozymbaev.

Oblys ákimdigi rezervtegi (ónerkásiptik) «Arna» aımaǵynda negizgi jobalardy anyqtady. Qazirdiń ózinde Alataýda 10 ınvestıtsııalyq joba júzege asyrylyp jatyr, Dolce-Group, Hyundai Green Food jáne TBEA sııaqty kompanııalarmen kelissózder júrgizilgen. 

Jaqynda «Alatau» AEA-nyń alǵashqy qatysýshylaryn tirkeý kútilýde. Almaty oblysy delegatsııasynyń Qytaıǵa, onyń ishinde Shenchjenge áleýetti ınvestorlarmen kezdesý úshin sapary josparlanǵan.