Úkimet sheteldik ınvestorlarmen jańa jobalardy iske qosý perspektıvalaryn talqylady

<p>ASTANA. KAZINFORM -&nbsp;QR Premer-Mınıstri Álıhan Smaıylov Harmony Capital Strategy AMC, Citius Capital AG, Torkam Holding jáne Marsel Group kompanııalarynyń basshylarymen kezdesý ótkizdi.</p>

Ortalyq memlekettik organdar basshylarynyń qatysýymen turǵyn úı jáne medıtsınalyq mekemeler qurylysy, jańartylatyn energııa kózderin damytý, kólik ınfraqurylymyn jaqsartý jáne t.b. salalardaǵy jobalardy iske asyrý máseleleri talqylandy.

Álıhan Smaıylov Úkimet eldegi iskerlik klımatty jetildirýge úlken kóńil bólip otyrǵanyn jáne jańa ınvestıtsııalyq bastamalarǵa ashyq ekenin atap ótti.

«Biz sizderdiń Qazaqstanda jobalardy júzege asyrý boıynsha nıetterińiz ben bastamalaryńyzdy quptaımyz», — dedi Premer-Mınıstr.

Óz kezeginde delegatsııa basshysy, Harmony Capital Strategy AMC negizin qalaýshy jáne Citius Capital AG bas dırektory Kaspar Vonlıch josparlanǵan jobalar boıynsha qazirdiń ózinde birqatar daıyndyq jumystary júrgizilgenin atap ótti.

«Biz jumys kezdesýlerin ótkizdik, birneshe ret aımaqtarǵa bardyq jáne Qazaqstanda ınfraqurylymdyq jobalardy qarjylandyrý boıynsha zor áleýet bar dep sanaımyz», — dedi ol.

Kezdesý qorytyndysy boıynsha Premer-Mınıstr memlekettik organdarǵa ınvestorlarmen yntymaqtastyqty odan ári damytý úshin kóterilgen barlyq máselelerdi zerdelep, pysyqtaýdy tapsyrdy.