Úkimet pen ákimder Memleket basshysynyń tıisti nusqaýlaryn, tapsyrmalaryn múltiksiz oryndaýǵa mindetti – Toqaev

<p>Ekonomıkalyq ózgeristerdiń ıgiligin jaqyn arada elimizdiń barlyq azamaty kórýge tıis. Bul týraly Aqordada Respýblıka kúnine oraı birqatar azamatqa memlekettik nagradalar men syılyqtar tapsyrýǵa arnalǵan saltanatty rásimde Memleket basshysy Qasym-Jomart Toqaev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Barshańyzǵa málim, men bıylǵy Joldaýymda elimizdiń jańa ekonomıkalyq baǵdaryn usyndym. Basty qaǵıdattarymyz ádildik, ashyqtyq jáne shynaıy báseke bolmaq. ıAǵnı, biz qazir Jańa ekonomıkalyq saıasatqa jol ashyp otyrmyz. Negizgi maqsat – ult baılyǵyn ádil bólý, ınfraqurylymdy jedel jańǵyrtý, kásipkerlikke qoldaý kórsetý jáne elimizge aýqymdy ınvestıtsııa tartý. Úkimet pen ákimder Memleket basshysynyń tıisti nusqaýlaryn, tapsyrmalaryn múltiksiz oryndaýǵa mindetti. Bul jumys Parlamenttiń jiti baqylaýynda bolýy kerek. Bir sózben aıtqanda, ekonomıkalyq ózgeristerdiń ıgiligin jaqyn arada elimizdiń barlyq azamaty kórýge tıis», - dedi Qasym-Jomart Toqaev.

Memleket basshysy Qazaqstan egemen memleket retinde árdaıym ulttyq múddesine saı keletin salmaqty ári syndarly syrtqy saıasat júrgizetindigin basa aıtty.

«Halyqaralyq qaýipsizdikti qamtamasyz etýdi kózdeıtin aımaqtyq jáne jahandyq úderisterde mańyzdy ról atqarady. Biz álemdik dinderdiń bir birimen jaqyndasyp, syndarly dıalog ornatýyna kúsh salamyz. Qazirgi zamanda memleketterdiń ujymdasyp kúsh jumyldyrýy jáne dıplomatııany danalyqpen ári joǵary kásibılikpen júrgizýi álemde uzaq ýaqyt boıy turaqtylyq ornaýyna, elderdiń jappaı damýyna, BUU-nyń Jarǵysyna negizdelgen ádiletti halyqaralyq qatynastar júıesi qurylýyna jol ashady. Qazaqstan «eldiń ishinde de, aınalasynda da beıbitshilik», «áralýandyq arqyly – birlikke» degen qaǵıdattardy árdaıym berik ustanady», - dedi Prezıdent.