Úkimet qol jetkizilgen Qazaqstan-Koreıa kelisimderin is júzinde júzege asyrýǵa daıyn

<p>ASTANA. KAZINFORM - Astanada Koreıa Respýblıkasynyń Prezıdenti ıÝn Sok El memlekettik sapary aıasynda Qazaqstan Premer-Mınıstri Oljas Bektenovpen kezdesý ótkizdi, dep habarlaıdy Úkimettiń resı saıty.</p>

Memleket basshysy Qasym-Jomart Toqaev pen Koreıa Prezıdenti ıÝn Sok Eldiń kelissózderi barysynda qol jetkizilgen ýaǵdalastyqtardy odan ári iske asyrý máseleleri talqylandy. Saýda-ekonomıkalyq yntymaqtastyqty keńeıtýge, ónerkásip, energetıka, avıatsııa jáne basqa da salalardaǵy ózara is-qımyldy kúsheıtýge nazar aýdaryldy.

«Qazaqstan saýda-ekonomıkalyq áriptestikti damytýda úlken perspektıvalardy kórip otyr. Ekijaqty yntymaqtastyqtyń serpindi damýyn qamtamasyz etý úshin Úkimet joǵary deńgeıde qol jetkizilgen barlyq ýaǵdalastyqtardy júzege asyrýǵa birden kirisýge daıyn», — dep atap ótti Oljas Bektenov.

Qazaqstan energetıka, sırek kezdesetin jer metaldaryn ıgerý jáne qaıta óńdeý, ınfraqurylym, avtomobılder men olardyń komponentterin óndirý, sý resýrstaryn tıimdi paıdalaný, qarjy jáne basqa da perspektıvaly salalarda birlesken jobalardy iske asyrýǵa múddeli.

Óńdeý sektoryn damytý — Memleket basshysynyń ekonomıkany ártaraptandyrý jónindegi tapsyrmasyn oryndaý maqsatyndaǵy Qazaqstan Úkimeti jumysynyń basym baǵyttarynyń biri. Búgingi tańda koreı kompanııalary qazaqstandyq mashına jasaýdy damytýǵa zor ınvestıtsııa salyp otyr.

Elimizde avtomobıl klasterleri qurylýda, quramdas bólshekter óndirisin retke keltirý josparlanýda. Mysaly, Almatyda Hyundai markaly avtomobılderdi shaǵyn toraptyq qurastyrý, Qostanaı oblysynda KIA brendi avtomobılderiniń óndirisi, Semeı qalasynda Daewoo Bus Global avtobýstarynyń birlesken óndirisi jolǵa qoıylǵan. Jaqyn arada koreıalyq kompanııalar Qazaqstanda avtomobılderge arnalǵan oryndyqtar men mýltımedıa shyǵara bastaıdy.

Taıaýda qol qoıylǵan kelisimderdi eskere otyryp, koreıalyq kompanııalardyń qatysýyn odan ári keńeıtý jáne iri korporatsııalardyń óndirisin lokalızatsııalaý úshin jańa perspektıvalar ashylýda.

Qazaqstannyń Ońtústik Koreıa tehnologııalaryn qoldana otyryp, elektrokarlarǵa arnalǵan akkýmýlıatorlardy óndirýge qyzyǵýshylyǵy bar. Oljas Bektenov avtomobıl ónerkásibindegi yntymaqtastyqty odan ári nyǵaıtýǵa jáne koreıalyq tarap elimizdiń avtomobıl ónerkásibi úshin qazaqstandyq kadrlar daıarlaý isine kómektesýge múddeli ekenin atap ótti.

Sonymen qatar Qazaqstan men Koreıa basym salalarda tehnologııalarmen almasýdy jáne jobalardy birlesip iske asyrýdy jandandyrýda. Qaldyqtardy suryptaý, qaıta óńdeý jáne joıý salasynda qoqys óńdeý zaýytyn salý jobasy perspektıvaly bolyp otyr.

Metallýrgııa salasynda ferroqorytpalar óndirisin jolǵa qoıý kerek. Geologııa salasynda sırek kezdesetin jer metaldaryn birlesip óndirý jáne qaıta óńdeý qajet, sondaı-aq keıinnen ózara tıimdi sharttarda Koreıaǵa jetkiziletin joǵary óńdelgen ónimderdi Qazaqstanda shyǵarý salasynda yntymaqtastyq ornatý kózdelgen.

Sýtegi energetıkasy da yntymaqtastyqtyń perspektıvaly baǵyttarynyń birine aınalýy múmkin. Óz kezeginde, lıft jabdyqtaryn óndirýdi lokalızatsııalaý qurylys nysandarynyń qaýipsizdigin arttyrady. Avıatsııada mádenı-gýmanıtarlyq baılanystar men iskerlik baılanystardy nyǵaıtý maqsatynda jańa jolaýshylar áýe baǵyttaryn ashý máselesi pysyqtalady. Bul ótken jyly Qazaqstanǵa kelgen koreılik týrıster sanynyń eki ese artýyna baılanysty qajet bolyp otyr.

Anyqtama: Qazaqstanda Koreıa Respýblıkasymen yntymaqtastyq jónindegi arnaıy qurylǵan jumys toby qyzmet isteıdi. Almaty oblysynda Lotte jańa kondıterlik fabrıkasynyń qurylysy, Qaraǵandy oblysynda Samsung turmystyq tehnıkasynyń óndirisi, Almaty qalasynda Hi Air Korea munaı-gaz jabdyǵy óndirisi jáne basqalary sekildi birqatar keleshegi bar jobalar pysyqtalyp jatyr.