Úkimet Qashaǵan men Qarashyǵanaqta gaz óńdeıtin zaýyt salý máselesin qarastyryp jatyr

<p>ASTANA. KAZINFORM &ndash; Qazaqstan Respýblıkasynyń Premer-Mınıstri Oljas Bektenov &laquo;Shell pls&raquo; kontserniniń atqarýshy vıtse-prezıdenti Pıter Kostellomen kezdesti, onda munaı-gaz salasyndaǵy birlesken jobalardyń iske asyrylý barysy qaraldy.</p>

QR Úkimeti baspasóz qyzmetiniń habarlaýynsha, Qarashyǵanaqty keńeıtý jobasy boıynsha munaı men kondensat óndirýdi jylyna keminde 11 mln tonna deńgeıinde ustap turý – basym mindetterdiń biri. Osy maqsatta taraptar shıki gazdy keri aıdaýdyń qosymsha kompressorlaryn ýaqtyly iske qosýdy qamtamasyz etedi. Sonymen qatar jobanyń tolyqqandy qyzmetin qamtamasyz etý maqsatynda aktsıonerlerdiń esebinen Qarashyǵanaqtaǵy qýaty jylyna 4 mlrd tekshe metr gaz óńdeý zaýytyn salý máselesi qarastyrylýda.

Qashaǵan ken ornynyń turaqty jumysyna erekshe nazar aýdaryldy. Ótken jyly munaı óndirý 18,77 mln tonna, gaz óndirý 11,86 mlrd m3, gazdy qabatqa keri aıdaý 5,83 mlrd m3 qurady. Ken ornyn tolyq ıgerý úshin Qashaǵanda gaz óńdeý zaýytyn salý máselesi pysyqtaý satysynda tur.

QR Úkimetiniń basshysy jobalardy iske asyrý sheńberinde, onyń ishinde Qazaqstan aýmaǵynda joq óndiristerdi oqshaýlaý arqyly qazaqstandyq qamtýdy arttyrýdyń basymdyǵyn atap ótti.

«Búginde joba operatorlarynyń jumysyndaǵy jergilikti qamtý úlesi qolaıly deńgeıde, al taýarlardy satyp alýdaǵy jergilikti qamtý úlesi áli de óte tómen. Bul ónim shyǵarýǵa múddeli jergilikti óndirýshilermen tyǵyz qarym-qatynasty qajet etedi», — dep atap ótti Oljas Bektenov.

Kezdesý qorytyndysy boıynsha qatysýshylar uzaq merzimdi yntymaqtastyqty odan ári damytý nıetin rastady. Sondaı-aq talqylaý nátıjesinde jaqyn arada ishki naryqta taýarlardy, jumystar men qyzmetterdi satyp alýdy ulǵaıtý maqsatynda jergilikti qamtýdy damytý baǵdarlamasy qaıta qaralatyn bolady.

Sonymen qatar kezdesýge qatysýshylar «Shell»kompanııasynyń Qazaqstandaǵy áleýmettik jáne bilim berý jobalarynyń oń áserin atap ótti.